Umuyobozi w’ishyaka rya FDU-Inkingi ritaremerwa mu Rwanda Madame Ingabire Umuhoza Victoire taliki ya 16 y’ukwa kane mu mwaka wa 2012 yafashe icyemezo cyo guhagarika kuburana mu rukiko rukuru rwa Kigali.
Madame Ingabire yafashe icyo cyemezo asobanurira urukiko ko yatakaje icyizere mu bwigenge bw’ubutabera bw’u Rwanda kandi ko abamwunganira bashyirwaho iterabwoba.
Ubushinjacyaha bw’u Rwanda bwo bwatangaje ko Madame Ingabire yagize ubwoba bwo gukomeza kuburana kandi urubanza rwari hafi kurangira.
Urukiko rwavuze ko rusuzuma icyemezo cya Madame Ingabire, rugatanga umwanzuro taliki ya 18 y’ukwa kane mu mwaka wa 2012.
Inkuru irambuye yateguwe n’umunyamakuru w’Ijwi ry’Amerika Assumpta Kaboyi uri I Kigali mu Rwanda.
