Muri Kenya, ibiganiro hagati ya leta na sendika y’abaganga bigamije guhagarika imyigaragambyo yabo byahagaze ntacyo bigezeho. Iyo myigaragambyo y’abaganga n’abandi bakora mu nzego z’ubuzima imaze hafi ibyumweru bitandatu.
Abigaragambya barasaba leta kubongerera umushahara no gushyira mu bikorwa ibyo impande zombi zari zarumvikanyeho ubwo imyigaragambyo nk’iyo na none yabaga mu 2017. Urwo rugaga rurimo abanyamuryango hafi 7,000.
Mu cyumweru gishize urukiko rushinzwe umurimo rwa Kenya rwari rwategetse abaganga na guverinema kugera ku bwumvikane bitarenze tariki ya 19, kugirango imyigaragambyo ibashe guhagarara.
Umunyamabanga mukuru wa sendika y’abaganga yavuze ko ibiganiro byahagaze ashinja leta kubashiraho igitsure ngo basubire mu kazi, aho kugirango ikemure ibibazo bayigejejeho.
Ipfundo ry’iyo myigaragambyo n’icyemezo cya leta cyo kugabanya imishahara y’abaganga bimenyereza umwuga. Aba ubusanzwe bahembwa hafi 30 ku ijana ryayo abaganga bamenyere bahembwa.
Abo baganga bimenyereza bahembwaga amadolari 1,530. Leta yo irifuza kuyagabanya akagera ku madolari 530. Leta ivuga ko idashoboye gukomeza guhemba abo baganga ayo mafranga bifuza.
Ubuyobozi bwa sendika y’abaganga buvuga ko imyigaragambyo izarangira ari uko leta ishyize mu bikorwa ibyifuzo byabo.
Imyigaragambyo y’abaganga muri Kenya iramenyerewe cyane. Ibi kenshi bigira ingaruka zikomeye ku barwayi. Benshi mu baganga bahitamo kujya gukorera mu bindi bihugu aho gukora batishimye.
Imyigarambyo yo mu 2017, yamaze iminsi 100. Icyo gihe hapfuye abantu benshi mu bitaro kubera kubura ababitaho.
Forum