Ingabo za ONU ziri mu butumwa bw’amahoro muri Repuburika ya Santrafurika, zirahamagarira abarwanya ubutegetsi n’imitwe y’abarwanyi guhita ihagarika ubushyamirane bumaze guhitana abantu hafi 30 muri uku kwezi.
Nubwo intambara yatangiye mu mwaka wa 2013 yahosheje bigaragara kuva mu 2018, haracyagaragara ibitero bivumbuka igihe n'igihe, hagati y’abarwanya ubutegetsi bafite intwaro n’ingabo z’igihugu, zifashijwe n’umutwe w’abacancuro b’Uburusiya, Wagner, hamwe n’imitwe y’abarwanyi.
Intumwa z’Amahoro za ONU muri Santrafurika, MINUSCA, mu butumwa zashyize ku rubuga X, rwahoze rwitwa Twitter, zavuze ko zamaganye ubwicanyi bw’agahomamunwa bwakozwe n’abantu bafite intwaro muri uku kwezi kwa kane.
Mw’itangazo, MINUSCA yavuze ko kw’itariki ya 2 y’ukwezi kwa kane, abakekwaho kuba ari abo mu mutwe wa 3R, bishe “abasivili 24, harimo abagore n’abana”, mu mujyi wa Lime mu majyaruguru y’uburengerazuba bw’igihugu.
Iryo tangazo ryavuze ko imirambo ine y’abasivili yabonetse kw’itariki ya 13 y’uku kwezi kwa kane mu majyepfo y’uburasirazuba kandi ko kw’itariki ya 14 nayo y’uku kwezi, umubare utatangajwe w’abantu bapfuye, wabonetse mu burengerazuba bw’igihugu.
Forum