Isirayeri ihiga ko ibwirizwa kwihora Irani, ikayasubiriza mu ndumane ku bitero yayigavyeko ku wa gatandatu w’indwi iheze.
Abategetsi b’igisirikare ca Isirayeri, bavuga ko Irani ibwirizwa kwishura “Ikiguzi c’ibisasu vya Misile 350 n’ibitero vy’indege zitagira abadereva” yagavye ku butaka bwayo.
Isirayeri yemeza ko vyinshi muri ivyo bitero, Irani yabikoze iri ku butaka bwayo, ibifashijwemwo n’abo Isirayeri yise sombambike za Irani.
Liyetena Jenerali Herzi Halevi atwara igisirikare ca Isirayeri, yavuze ko Irani ibwirizwa kubona ingaruka z’ibikorwa vyayo.” Uwu mutegetsi ntiyigeze atomora ingene Isirayeri itegekanya kwihora. Umushikiranganji wo kwivuna abansi muri Isirayeri, gusa yashimangiye ko Isirayeri izokwihora ku mwanya mwiza izohitamwo.
Isirayeri ivugiye ku mugaragaro ko izokwihora Irani, mu gihe Amerika n’ibindi bihugu birimwo ivy’I Buraya vyari vyayisavye kwihoza ivy’ukwihora. Amerika isigura ko kuba Isirayeri yarashoboye kuburizamwo 99% vy'ibitero yayigavyeko ari intsinzi ikomeye.
Impande zitandukanye zirimwo Iraki, Amerika, n’umuryango w’ubumwe bwa Buraya zifise amakenga ko Isirayeri ikaramuka yihoye, bizoca bikwega intambarta mu karere ivyo bihugu birimwo, gutyo bigahungabanya umutekano w’amakungu.
Ibiro vya prezida w’Amerika bitangaza ko ibihugu indwi bitunze gusumba ibindi ( Amerika, Canada, Ubudagi, Ubwongereza, Ubutariyano, Ubufaransa n’Ubuyapani), biza vyatanguye imishikirano yo kuraba ingene Irani yofatirwa ibindi bihano.
Isirayeri yashoboye gukorora misile na drone za Irani ibifashijwemwo n’Amerika, Ubwongereza, Ubufaransa, Yorodaniya na Arabiya Sawudite.
Irani ivuga ko yateye Isirayeri kugira yihore igitero yemeza ko yagavye ku buserukizi bwayo muri Siriya kigahitana babiri. Isirayeri ntiyigeze yemera canke ihakane uruhara rwayo muri ico gitero cahitanye aba jenerari ba Irani 2.
Forum