Imisegetera iharurwa ku 2000 n’iyindi mitego itemewe n’amategeko ikoreshwa mu burovyi kur’uyu wa gatanu yaturiwe ku cambu ca Nyagisozi c’ikiyaga Rweru muri komine Busoni, mu ntara ya kirundo.
Muri ico gikorwa, umurwi w’igihugu ujejwe umutekano wo mu mazi wasatuye kandi amato akoreshwa mur’ubwo burovyi.
Gerard Nyandwi, umuyobozi mukuru w’igisata kijejwe uruja n’uruza mu mazi, guteza imbere ibivuko n’indarayi akaba ari nawe yar’arongoye uwo mugwi avuga ko biriko bikorwa mu ntumbero yo kugarukira umwimbu w’amafi ubangamiwe n’uburovyi budakurikije amategeko.
Bene imitego yaturiwe barashima ico gikorwa ariko basaba Kwitabwaho kugira akazi kabo kabandanye.
Mugihe abanyagihugu bavuga ko ata mikoro bafise yo kugura ibikoresho vyemewe n’amategeko, Gerard Nyandwi ahanura abo banyagihugu gushira inguvu hamwe.
Nyandwi amenyesha ko umwimbu umaze kwiyongera aho bamaze gutuza bihagije uburovyi butemewe n’amategeko, agatanga akarorero ko ku vyambu vyo ku kiyaga Tanganyika nka Nyanza-Lac.
Facebook Forum