Uko wahagera

Mu kwezi kwa gatatu uyu mwaka, nibwo uwari wungirije umuyobozi mukuru wa Polisi mu gihugu cya Uganda yarasiwe mu mujyi wa Kampala. Iminsi itanu nyuma y’urupfu rwe, Polisi y'iki gihugu yatangaje ko yataye muri yombi abantu 17 bakekwaho uruhare muri ubu bwicanyi.

Ku itariki ya gatanu uku kwezi, nibwo bagejejwe bwa mbere imbere y’urukiko, ari naho batangarije umucanza ko bakorewe iyicarubozo n’abashinzwe umutekano ndetse ko nyuma yo gufatwa bamaze igihe kinini bahambiriye batanagaburirwa. Uru rubanza rwanyujijwe kuri televiziyo y’iki gihugu.

Umuvugizi wa Polisi ya Uganda Asan Kasingye yagize ati: “Iyicarubozo ntiryemewe mu bugenzacyaha, uwabigizemo uruhare wese agomba kubiryozwa, ndetse haba hari n'uwamutumye na we agakurikiranwa.Vubaha turatangiza uburyo bushya bwo kurihashya.”

Kuri uyu wa kane aba bakurikiranwa kuri ubu bwicanyi bongeye kugezwa imbere y’urukiko, gusa kuri iyi nshuro bagaragaraga nk'abameze neza n'ubwo bikigaragara ko bafite inkovu ku maboko.

Mu ntangiriro z'iki cyumweru Perezida Yoweri Museveni yasohoye itangazo ryihanangiriza abakoresha iyicarubozo mu bugenzacyaha. Yagize ati: “Iyicarubozo si ngombwa ntirinakwiye” nta n'ubwo ritanga amakuru yizewe. Ntirikwiye gukoreshwa.

Iri tangazo ryasohotse nyuma y'aho Minisitiri w’umutekano mu gihugu yemeye amakosa, anasaba imbabazi imbere y’inteko ishingamategeko kuri raporo y’itangazamakuru kw'iyicarubozo muri Uganda.

Facebook Forum

XS
SM
MD
LG