Leta zunze ubumwe yasohotse ku mugaragaro mu masezerano y'i Paris yo kurwanya ihindagurika ry'ibihe. Amasezerano y'i Paris, umurwa mukuru w'Ubufaransa, yasishyizweho umukono mu 2015 n'ibihugu n'imiryango mpuzamahanga byose hamwe 197.
Perezida Donald Trump wa Leta zunze ubumwe z'Amerika yatangaje bwa mbere mu kwezi kwa gatandatu mu 2017 ko ateganya kuyavanamo igihugu cye, avuga ko gushyira mu bikorwa aya masezerano byangiriza ubukungu bwacyo. Ku italiki ya 4 y'ukwa 11 mu 2019, guverinoma ye yandikiye ku mugaragaro Umuryango w'Abibumbye koko ko iyasotsemo.
Kugirango bibe burundu, byasabye umwitangirizwa w'igihe cy'umwaka, nk'uko amasezerano abiteganya. Umwaka rero wuzuye uyu munsi, bityo Leta zunze ubumwe z'Amerika ntikiri mu masezerano y'i Paris. Ni cyo gihugu cyonyine gusa kiyavuyemo kugeza ubu.
Ingaruka z'iki cyemezo: abadipolomate barasanga bizagorana kubahiriza amasezerano y'i Paris Leta zunze ubumwe z'Amerika itayariomo. Iki gihugu ni icya kabiri ku isi, inyuma y'Ubushinwa, cyohereza mu kirere ibyuka bigihumanya.
Uretse ibyo, kuba Leta zunze ubumwe z'Amerika isohotse mu masezerano y'i Paris biteye icyuho kinini mu ngengo y'imali, nk'uko Patricia Espinosa na Tanguy Gahouma-Bekale babisobanura. Patricia Espinosa ni umunyamavanga nshingwabikorwa w'ibiro bihoraho by'Umuryango w'Abibumbye bishinzwe guhuza ibikorwa byo kurwanya ihindagurika ry'ibihe. Naho Gahouma-Bekale ni umuyobozi w'itsinda ry'Afrika mu biganiro mpuzamahanga ku mihindukire y'ibihe.
Guverinoma ya Leta zunze ubumwe z'Amerika yo ku gihe cya Perezida Barack Obama yari yemeye gutanga amadolari miliyari eshatu yo gutera inkunga ibihugu bikennye mu bikorwa byo kurwanya imihindukire y'ibihe. Kugeza ubu, Leta zunze ubumwe z'Amerika imaze gutanga amadolari miliyari imwe gusa.
Abashoramali b'Abanyabulayi n'Abanyamerika, bafite umutungo w'amadolari miliyari ibihumbi 30, uyu munsi bahamagariye Leta zunze ubumwe z'Amerika kugaruka mu masezerano y'i Paris.
Facebook Forum