Abantu 10 barimo umupolisi biciwe mu nzu y'ubucuruzi muri Leta ya Colorado muri Leta zunze ubumwe z'Amerika. Ayo makuru yemejwe n’umuyobozi mukuru wa polisi y’umujyi wa Boulder muri Leta ya Colorado, Maris Herold. Yavuze ko mu bishwe barashwe mu gitero cyagabwe ku nzu y’ubucuruzi kuri uyu wa mbere harimo, umupolisi Eric Talley, umwe mu ba mbere bagiye gutabara.
Herold yavuze ko umuntu umwe kugeza ubu, ari we watawe muri yombi ashinjwa ubwo bwicanyi. Yongeyeho ko iperereza rigikorwa kandi ko rishobora kumara iminsi igera kuri itanu.
Ukuriye ubugenzacyaha muri ako gace, Michael Dougherty, we yavuze ko batarashobora kumenya neza impamvu zatumye uwo mugabo w’umuzungu watawe muri yombi, afata icyemezo cyo kugaba igitero kuri iyo nzu y’ubucuruzi.
Gusa yasezeranyije ababuze ababo ko bazahabwa ubutabera bubakwiriye. Inzego z’ubutegetsi mu mujyi wa Boulder zo zivuga ko zikomeje ibikorwa byo gushakisha amakuru ku bazize icyo gitero no kuyamenyesha imiryango yabo.
Si ubwa mbere ibitero nk’ibi biba muri Leta ya Colorado. Iki kije gikurikira ibindi birimo icyo mu mwaka wa 2012 cyagabwe mu nzu yerekana sinema mu mujyi wa Aurore n’ikindi cyabaye ku ishuli ryo mujyi wa Columbine.
Iki gitero kandi kibaye, nyuma y’iminsi umunani gusa habaye ikindi mu mujyi wa Atlanta muri leta Georgia, cyahitanye abantu umunani.
Facebook Forum