Abadepite ba Leta zunze ubumwe z'Amerika batoye umwanzuro wo kurega mu nkiko Mark Meadows, wahoze ari umuyobozi w'imilimo mu biro bya Perezida Donald Trump. Baramushinja gusuzugura inteko ishinga amategeko, Congress.
Mark Meadows, w'imyaka 62 y'amavuko, yabaye depite w'ishyaka ry'Abarepubulikani kuva mu 2013 kugera ku italiki ya 30 y'ukwa gatatu 2020. Ni bwo yasezeye mu nteko ishinga amategeko, ajya kuba umuyobozi w'imilimo mu biro by'umukuru w'igihugu Donald Trump, kugeza ku italiki ya 20 y'ukwa mbere k'uyu mwaka w'2021.
Komisiyo yihariye y'Umutwe w'Abadepite irimo ikora anketi ku gitero cy'abayoboke ba Trump cyo ku italiki ya 6 y'ukwa mbere gushize kuri Capitol, ingoro y'inteko ishinga amategeko y'Amerika, yahamagaje Meadows ngo aze kuyisobanurira ibyo yaba azi kuri iki gitero. Yanze kwitaba, bituma rero Abadepite bemeza umwanzuro wo kumurega mu rukiko icyaha cyo gusuzugura inteko ishinga amategeko.
Ariko rero, Inteko igomba gushyikiriza ikirego minisitiri w'ubutabera, Merrick Garland, ari na we mushinjacyaha mukuru wa Leta zunze ubumwe z'Amerika. Ni we uzafata umwanzuro kujyana dosiye ya Mark Medows mu nkiko.
Meadows abaye uwa kabiri mu bantu bakoranye hafi na Perezida Trump uregwa gusuzugura inteko ishinga amategeko. Uwamubanjirije ni Steve Bannon, wamubereye umujyanama wa mbere kuva ku 20 y'ukwa mbere kugera kuri 18 y'ukwa munani 2017. Bannon yitabye urukiko bwa mbere mu kwezi gushize.
Itegeko rivuga ko icyaha cyo gusuzugura inteko ishinga amategeko gishobora guhanishwa igifungo kiri hagati y'ukwezi kumwe n'umwaka umwe, n'ihazabu y'amadolari 1.000.
Facebook Forum