Muri Leta zunze ubumwe z'Amerika, Christopher Wray, umuyobozi mukuru w'ikigo cy'igihugu cy'ubugenzacyaha FBI, yatangaje ko abantu bakoze igitero ku nteko ishinga amategeko bakomeje gutabwa muri yombi.
Ku italiki ya 6 y'ukwa mbere gushize, abayoboke b'uwari umukuru w'igihugu, Donald Trump, bateye Capitol bashaka kubuza inteko ishinga amategeko kwemeza ibyavuye mu matora yo mu kwa 11 gushize n'intsinzi ya Joe Biden wari uyahanganyemo na Trump.
Bwa mbere nyuma y'iki gitero, Christopher Wray yitabye Komite y'Umutwe w'Abadepite igenzura inzego z'ubutabera. Yabanje kucyamagana, avuga ko ari "igitero cy'iterabwoba ry'imbere mu gihugu" ariko yirinda kukita "kwigomeka ku nzego z'ubutegetsi."
Yatangaje ko abantu bamaze gutabwa muri yombi bagera kuri 500, kandi n'abandi bazakomeza gufatwa. Abenshi bashinjwa ibyaha byo kwinjira aho batabyemerewe n'amategeko n'ibindi byoroheje. Wray yavuze ko abashinjacyaha bateganya kubashyiraho ibindi byaha biremereye, nk'uko byagendekeye abarenga 36 bo mu mitwe y'Abazungu b'abagezanguni yitwa "Oath Keepers" na "Proud Boys" baregwa ubugambanyi.
Abadepite babajije cyane muyobozi wa FBI niba hari anketi abagenzacyaha be baba barimo bakora kuri Trump, barega gushishikariza abayoboke be gutera Capitol. Wray yabihunze, ati: "Sintekereza ko byaba bikwiye kuvuga niba zaba zihari cyangwa niba ntazaba zihari ku bantu runaka ku giti cyabo."
Facebook Forum