Uko wahagera

Urubanza rwa Jacob Zuma Ruzatangira mu kwa Gatanu


Jacob Zuma wahoze ari perezida w'Afurika y'Epfo

Urubanza rw'uwahoze ari umukuru w'igihugu cy'Afrika y'Epfo, Jacob Zuma, ruzatagira mu kwezi kwa gatanu gutaha. Zuma akurikiranyweho ibyaha bya ruswa.

Umushinjacyaha Billy Downer yabwiye urukiko rukuru rwa Pietermaritzburg ko ibibazo byose byo mu mbanzirizarubanza byarangije gukemuka. Ati: "Twiteguye kuburana mu mizi y'urubanza, kandi n'abaregwa nabo ni uko."

Umucamanza Nkosinathi Chili yabwiye impande zombi kwitegura kuzatangira kuburana urubanza mu mizi yarwo guhera ku italiki ya 17 y'ukwezi kwa gatanu gutaha. Yasobanuye ko atanze icyo gihe cyose kubera icyorezo cya virusi ya Corona, kugirango umuburanyi ureganwa na Jacob Zuma azabone umwanya uhagije wo kwitegura gufata indege.

Jacob Zuma we ntiyari mu rukiko uyu munsi ubwo iki cyemezo cyafatwaga. Ariko impaka zahitaga kuri televiziyo ya leta mu gihe zirimo ziba. Urukiko rwavuze ko urubanza ruzarangira mu kwa gatandatu gutaha.

Jacob Zuma, wabaye umukuru w'igihugu imyaka icyenda kuva mu 2009 kugera mu 2018, areganwa na sosiyete ikora kandi igurisha intwaro yitwa Thales yo mu Bufaransa.

Ubushinjacyaha buvuga ko Thales yahaye ruswa Zuma kugirango ayorohereze gutwara isoko ryo kugurisha mu gisilikali cy'Afrika y'Epfo intwaro z'agaciro k'amadolari miliyari ebyiri. Iyi ruswa, nk'uko ikirego kibyemeza, ingana n'amadolari ibihumbi 34 Zuma yagombaga gufata buri mwaka guhera mu 1999, ubwo yari visi-perezida wa Repubulika. Zuma na Thales barabihakana, bakavuga ko ari abere.

Uretse uru rubanza, komisiyo y'igihugu cy'Afrika y'Epfo ishinzwe kurwanya ruswa isabira Zuma igifungo cy'imyaka ibili kubera ko yigeze gusuzugura urukiko, yanga kurwitaba, mu rundi rubanza narwo ashinjwamo ibyaha bya ruswa.

Facebook Forum

XS
SM
MD
LG