Uko wahagera

Umwuka Mubi Hagati ya Kenya na Somaliya


Umuvugizi wa Leta ya Kenya Cyrus Oguna. Yavuze ko Kenya na Somalia bari mu biganiro

Somaliya yahaye iminsi irindwi abadipolomate ba Kenya kugirango babe bavuye mu gihugu basubiye iwabo.

Ejo kuwa kabiri ni bwo minisitiri w'itangazamakuru wa Somaliya, Osman Dubbe, yatangaje ko guverinoma ye yafashe icyemezo guca umubano na Kenya. Yaravuze ngo "leta ya Kenya ishaka gucamo ibice abaturage b'ibihugu byombi. Iki cyemezo ni igisubizo ku bikorwa bya Kenya byo kwivanga muri politiki bwite ya Somaliya no guhungabanya ubusugire bwayo."

Somaliya yahaye iminsi irindwi abadipolomate ba Kenya kugirango babe bavuye mu gihugu basubiye iwabo. Somaliya kandi yahamagaje n'abadipolomate bayo bo muri ambasade yayo i Nairobi. Mu kwezi gushize, Somaliya yari yirukanye ambasaderi wa Kenya i Mogadiscio, Lucas Tumbo.

Kenya yo ivuga ko nta cyemezo izafatira Somaliya. Umuvugizi wa guverinoma ya Kenya, Cyrus Oguna, yatangaje ko impande zombi ziri mu biganiro. Ati: "Leta yashyizeho komite yo kubikurikirana." Ariko nta bindi bisobanuro yahaye Ijwi ry'Amerika kuri iyi komite.

Kenya yemeza ko itivanga mu bibazo bwite bya Somaliya. Nyamara rero, perezida Uhuru Kenyatta aherutse kwakira perezida wa leta ya Somaliland, Muse Bihi Abdi. Somaliland ivuga ko ari repubulika yigenga. Guverinoma ya Somaliya ntibyemera, ikavuga ko Somaliland ari igice cyayo. Kuri leta ya Somaliya rero, inama ya Kenyatta na Bihi Abdi ni ukwivanga mu bibazo bwite bya Somaliya.

Kenya na Somaliya kandi bafitanye ibibazo by'umupaka ugusha kuri Jubbaland, leta yo mu majyepfo ya Somaliya ifite icyambu cya Kismayo, ku nyanja y'Abahinde. Uyu mupaka wo mu mazi urimo ubukungu bwinshi bwa peteroli na gazi. Buri gihugu kivuga ko uyu mutungo ari uwacyo.

Facebook Forum

XS
SM
MD
LG