Uko wahagera

Umuyobozi w'Intara muri Somaliya Yarusimbutse


Umuyobozi w'intara muri Somaliya yarusimbutse kuri uyu wa gatandatu ubwo yarokokaga igitero cy'umwiyahuzi witurikirijeho igisasu muri imwe mu mazu afungurirwamo mu mujyi wa Baidoa mu majyepfo ashyira uburengerazuba bw'igihugu.

Ababibonye bavuze ko umugabo wambaye ikote rihambiriyeho ibisasu yagerageje kwegera Ali Wardhere Dooyow, umuyobozi w'iyo ntara, ariko ushinzwe umutekano we akamukumira. Uwo mwiyahuzi yahise aturitsa ibyo bisasu biramuhitana we n'abasivili batatu n'ushinzwe umutekano w'umukuru w'intara.

Umwe mu babibonye, Liban Ibrahim, yabwiye Ijwi ry'Amerika ko uwo muyobozi w'intara yari amaze akanya gato ahageze azanye n'abantu babiri. Yavuze ko bamwicaye iruhande bagasaba ikawa nyuma y'akanya gato bakumva ikintu gituritse. Ibrahim yavuze ko yabonye abantu baryamye hasi bamwe bakomeretse abandi bapfuye.

Umwe mu bashinzwe umutekano utashatse ko izina rye ritangazwa yabwiye Ijwi ry'Amerika, ko abarinda uwo muyobozi bari baryamiye amajanja kuko hari hashize iminsi bamenyeshejwe ko ashobora kugabwaho igitero.

Mu yandi makuru asa n'ayo, abapolisi babiri bashinzwe umutekano wo mu muhanda mu mujyi wa Mogadishu baturikanywe n'igisasu mu karere ka Yaqshid. Bombi bari mu nzira bajya kureba ahabereye impanuka.

Undi umwe mu bashinzwe umutekano yaturikanywe n'igisasu cyatezwe mu modoka ye mu mujyi wa Kismayo nkuko byemezwa n'abashinzwe umutekano. Umutwe wa Al-Shabab wigambye ibyo bitero byose uko ari bitatu.

Facebook Forum

XS
SM
MD
LG