Umunyapolitike utavuga rumwe na Leta muri Uganda yahamagariye abatuye icyo gihugu guhaguruka bagatangiza imyigaragambyo y’amahoro yo gukuraho Perezida Yoweri Museveni umaze imyaka 35 ku butegetsi.
Umunyapolitike Robert Kyagulanyi uzwi nka Bobi Wine ni we watanze iyo mpuruza nyuma y’igihe gito atsinzwe mu matora y’umukuru w’igihugu yabaye mu kwezi kwa mbere.
Muri ayo matora Perezida Museveni yatsindiye kuyobora manda ya gatandatu ku majwi 58 ku ijana. Bobi Wine bari bahanganye we yabonye 35 ku ijana. Gusa uyu munyapolitike yaje kutemera ibyavuye mu matora. Avuga ko ayo matora yibwe kandi ko yarimo uburiganya bwinshi. Yaje kujuririra inkiko asaba ko amajwi yatangajwe na komisiyo y’amatora agirwa impfabusa, ariko nyuma aza gukura ikirego cye mu rukiko, asobanura ko Atari yizeye imikirize y’urwo rubanza.
Kuri uyu wa Kabiri Bob Wine yahamagariye abaturage guhaguruka bakarwanya ubutegetsi avuga ko bubakandamiza bukabahindura abaja.
Kuva amatora arangiye mu kwezi kwa mbere, uyu munyapolitike utavuga rumwe na leta yakomeje kuvuga ko abayoboke be bashimutwa, abandi bakaburirwa irengero.
Polisi ya Uganda yahise yamagana ibyavuzwe na Bobi Wine, ivuga ko ibyo ahamagarira abaturage gukora bitemewe n’amategeko. Yahise ivuga ko na yo yiteguye gufata igashyikiriza inkiko abazica amategeko.
Facebook Forum