Uko wahagera

Ubwoko Bushya bwa Covid 19 Bubangamiye Ubucuruzi mu Bulayi


Ibihugu byo mu majyepfo y'Ubulayi biragenda bisubizaho ingamba zo kwirinda Covid 19 mu gihe hakomeje kugaragara abatari bake bandura ubwoko bwayo bushya bwitwa Delta, bwagaragaye bwa mbere mu Buhinde.

Esipanye, Portugali, Ubugiriki, Shipure na Malta byabaye mu bihugu bya mbere byakinguye amarembo uyu mwaka ugitangira, ariko ubu byatangiye gukaza ingamba ku binjira cyane cyane abatarabona inkingo za Covid 19 za Pfizer na AstraZeneca zikoreshwa cyane muri ibyo bihugu.

Ubufaransa n'Ubudage biraburira abaturage babyo kudatemberera muri Esipanye na Portugali. Ubudage bwo bwatangaje ko igihugu cya Shipure kiri ku rutonde rw'ibyo bagomba kwitondera gusura. Abaturage b'Ubudage batarikingiza basura icyo gihugu basabwa kwishyira mu kato mu gihe bagarutse iwabo.

Ingamba zo kwirinda zishyizweho ku buryo butunguranye ziragenda zikoma mu nkokora imikorere y'ikompanyi z'indege n'ubucuruzi bushingiye ku bukerarugendo.

Abari muri ubwo bucuruzi bari bafite ibyiringiro ko muri aya mezi buzazanzamuka, icyuho cy'ubukungu cyatewe n'icyorezo cya Covid 19 kikagabanuka.

Abatari bake baratinya ko iri hindagurika n'isubizwaho rya zimwe mu ngamba zari zavanyweho bica intege abakunda gutembera, bigatuma abari muri ubwo bucuruzi ndetse n'amahoteli bari baragumye guhanyanyaza, noneho babura aho berekeza. (VOA)

Facebook Forum

XS
SM
MD
LG