Uko wahagera

Ubushinwa Ntibwishimira ko Abanyamerika Bamwe Babwita Umwanzi


Intumwa z'Amerika n'Ubushinwa mu biganiro

Ubushinwa na Leta zunze ubumwe z'Amerika bari mu biganiro byo mu rwego rwo hejuru i Tianjin, mu majyarugugu y'Ubushinwa. Batangiye baterana amagambo akarishye.

Intumwa za Leta zunze ubumwe z'Amerika ziyobowe na minisitiri w'ububanyi n'amahanga wungirije, Madame Wendy Sherman. Iz'Ubushinwa ziyobowe na minisitiri w'ububanyi n'amahanga wungirije, Xie Feng.

Ibigo ntaramakuru bitandukanye byemeza ko muri iyo nama, Feng yasabye Amerika "guhindura politiki yayo mu mibanire y'ibihugu byombi kubera ko iteza ingorane zikomeye." Ati: "Abanyamerika bamwe na bamwe bishyizemo, kandi ntaho babikuye, ko Ubushinwa ari umwanzi." Kuri we, Amerika ikora ibishoboka byose kugirango Ubushinwa budatera imbere.

Ku ruhande rwe, Wendy Sherman yanditse kuri Twitter ko yibanze ku "burenganzira bwa muntu, amahame ya demokarasi, no gupiganwa hagati y'ibihugu byombi mu buryo bwubahiriza amategeko mpuzamahanga." Mu kiganiro yagiranye kuri telefone n'ikigo ntaramakuru AP cyo muri Amerika, Sherman yatangaje ko "bagiye mu Bushinwa ntacyo bateze kigaragara mu nama yabo."

Leta zunze ubumwe z'Amerika n'Ubushinwa ni byo bihangange bya mbere mu bukungu ku isi. Bafite amakimbirane ku bibazo binyuranye, birimo by'umwihariko guhangana mu rwego rw'ubucuruzi, icy'uburenganzira bwa muntu, n'icy'ibitero bikomeye byo ku ikoranabuhanga, "cyber hacking" mu Cyongereza, Amerika irega Ubushinwa.

Facebook Forum

XS
SM
MD
LG