Uko wahagera

Uburusiya: Alexey Navalny Yahagaritse Imyigaragambyo yo Kwiyicisha Inzara


Hashize iminsi 24 Alexey Navalny, umunyepolitiki utavuga rumwe n'ubutegetsi bwa Perezida Vladimir Putin, yarahagaritse gufata amafunguro, ku itariki ya 31 y'ukwezi gushize. Yigaragambyaga kubera uburyo afashwe muri gereza. Avuga ko leta yari yaramwimye abaganga bo kumuvura indwara zitandukanye, n'inkurikizi z'uburozi bamuhaye mu kwezi kwa munani mu mwaka ushize. Navalny kandi yavugaga ko abarinda gereza bamukoreraga iyicarubozo, bamukangura buri saha bakamubuza gusinzira nijoro.

Navalny, abinyujije ku rubuga nkoranyambaga Instagram, yatangaje ko ahagaritse imyigaragambyo, "kubera ko yizeye abaganga bamuvuye inshuro ebyiri mu iki cyumweru mu bitaro bya gisivili, badafite aho bahuriye na gereza, ko dosiye y'ubuzima bwe bayoherereje abaganga be bwite, no kubera inkunga iremereye cyane yabonye mu gihugu cyose no mu mahanga."

Koko rero, abayoboke be ibihumbi n'ibihumbi bakoze imyigarambyo yo kumushyigikira. Iherutse yabaye ejobundi kuwa gatatu, ihuza abantu ibihumbi n'ibihumbi. Ubutegetsi bwataye muri yombi 1,900 muri bo burabafunga.

Naho ku rwego mpuzamahanga, ikibazo cya Navalny cyateye umwuka mubi hagati y'Uburusiya n'ibihugu byo mu burengerazuba bw'isi. Byavuze ko bizafatira ibihano Uburusiya Alexey Navalny naramuka apfiriye muri gereza.

Facebook Forum

XS
SM
MD
LG