Perezida w’Ubufransa, yatangaje ko bagiye kongera umurego mu gutanga inkingo za Covid 19. Ibi Perezida Emmanuel Macron abivuze nyuma y’uko we na guverinema ye bakomeje kunengwa ko igikorwa cyo gutanga inkingo gikomeje kugenda buhoro.
Ubwo yasuraga ahantu hakingirirwa abantu mu mujyi wa Valenciennes, yavuze ko guhera mu kwezi gutaha kwa kane ibintu bigiye guhinduka. Ibyo birimo gukingira abantu iminsi yose harimo n’iminsi y’ikiruhuko ya wikendi.
Ubufransa buracyari inyuma cyane mu gukingira abaturage bayo ugereranije n’ibindi bihugu byo ku mugabane w’Ubulayi. Kugeza ubu bumaze gukingira abantu hafi miliyoni icyenda mu gihe mu bindi bihugu nk’Ubwongereza bamaze gukingira abarenga miliyoni 30.
Nubwo muri icyo gihugu bakomeje kugerageza kwihutisha igikorwa cyo gutanga inkingo, umubare w’abandura Covid 19 ni nako nawo wiyongera. Biravugwa ko abantu hafi 30,000 bandura iyo virusi ku munsi.
Leta ivuga ko kuba umubare w’abakingirwa ukiri hasi, biterwa ahanini n’ubuce bw’inkingo mu gihugu.
Facebook Forum