Uko wahagera

Ubudage Bwashize Hezbollah ku Rutonde rw'Imiitwe y' Iterabwoba


Chanseliyeri w'Ubudage Angela Merkel na minisitiri w'ubutegetsi bw'igihugu w'Ubudage, Horst Seehofer,

Leta y'Ubudage yashize Hezbollah ku rutonde rwayo rw'imitwe y'iterabwoba ihita iyica ku butaka bwayo. Hezbollah ni umutwe wo muri Libani wo mu ishami rya Islam ry'Abashiite. Wavutse mu 1982. Nk'uko leta z'ibihugu zitandukanye zibyemeza, yashinzwe na Irani.

Ifite ishami rya gisilikali n'ishami rya politiki. Ishami ryayo rya gisilikali risanzwe riri ku rutonde rw'imitwe y'iterabwoba mu Budage, ndetse no mu bindi bihugu by'Ubulayi bwunze ubumwe. Ariko ishami rya politiki ryo ryari ryemewe mu Budage kugeza ubu. Gusa Leta zunze ubumwe z'Amerika na Israeli, bo bashyize Hezbollah yise mu mitwe y'iterabwoba, bahoraga botsa igitutu leta y'Ubudage kugirango ice Hezbollah.

Uyu munsi, minisitiri w'ubutegetsi bw'igihugu w'Ubudage, Horst Seehofer, yatangaje ko yahagaritse ku butaka bw'Ubudage "ibikorwa byose by'umutwe w'iterabwoba Hezbollah." Asobanura ko Hezbollah "yakoze ibitero byinshi by'iterabwoba no gushimuta abantu ku isi. Kandi bimwe muri byo ibitegurira ku butaka bw'Ubudage."

Mu itangazo rye, minisitiri Seehofer arakomeza, ati: "Hezbollah ntiyemera ko Israeli ifite uburenganzira bwo kubaho. Ihora ivuga ko Israeli ihanagurika ku ikarita y'isi kandi kurengera leta ya Israeli ari cyo kiri ku isonga y'ibyo leta y'Ubudage yari yemeje nyuma y'intambara ya kabiri y'isi yose."

Minisitiri w'ubutegetsi bw'igihugu w'Ubudage yabitangaje abapolisi amagana bari bazindutse mu ruturuturu basha imisigiti y'abayoboke ba Hezbollah mu murwa mukuru Berlin no mu mijyi ya Breme, mu majyaruguru y'igihugu, na Münster, no mu "kigo cy'impunzi z'Abalibani" cyashinzwe na Hezbollah mu mujyi wa Dortmund mu burengerazuba bw'Ubudage.

Leta y'Ubudage ivuga ko abayoboke ba Hezbollah bari ku butaka bwayo bagera ku gihumbi kandi ko harimo bamwe bari abacanshuro barwanye muri Siriya.

Facebook Forum

XS
SM
MD
LG