Uko wahagera

U Rwanda Rwakuyeho TVA ku Bikoresho by'Isuku ku Bari mu Mihango


Ibikoresho by’isuku y’abagore n’abakobwa bari mu mihango mw'ibutike mu Rwanda

Leta y’u Rwanda uyu munsi yakuyeho amahoro nyongeragaciro bita TVA yose ku bikoresho by’isuku y’abagore n’abakobwa bari mu mihango.

Minisiteri y'uburinganire n'iterambere ry'umuryango yatangaje ko iki cyemezo gitangira gushyirwa mu bikorwa uyu munsi. Aya mahoro yanganaga na 18%, agatuma ibi bikoresho bihenda, kugera n’aho abana b’abakobwa babibura bagata ishuli.

Mu 2017, minisiteri y’uburezi y’u Rwanda yatangaje ko abakobwa bafite imyaka 16 kuzamura bashobora kuva mu mashuli 8% kurusha abahungu bari mu kigero kimwe. Iyi minisiteri yasanze imwe mu mpamvu zibitera ari ukubura ibikoresho by’isuku iyo abakobwa bari mu mihango. Gukuraho TVA yose biri mu rwego rwo korohereza abagore n’abakobwa kubibona bitabahenze, nk’uko minisiteri y'uburinganire n'iterambere ry'umuryango ibisobanura.

Ku isi yose, abagore bavuga ko biri mu bikenerwa by’ibanze, ko rero bidakwiye gusoreshwa. Nk’uko tubikesha ikinyamakuru cyo kuri Internet Umuryango, agapaki kamwe karimo udukoresho 10 kagura amafaranga hagati y’amafaranga 900 n’1000 y’Amanyarwanda. Gukuraho uyu musoro ku nyongeragaciro wa 18%, igiciro gishobora kugabanuka kugera ku mafaranga 820.

Ariko ku mpirimbanyi zaharaniye ko uyu musoro uvaho, “yego kuwukuraho ni byiza, ariko ntibihagije.” Umwe muri bo, Annette Mugisha, yabwiye ikigo ntaramakuru AFP cyo mu Bufaransa, ati: “Turifuza ko ibikoresho biboneka ku buntu mu mashuli yose, kugirango abakobwa b’abanyeshuli barekere aho guhangayika.”

Facebook Forum

XS
SM
MD
LG