Minisiteri y’Ubuzima mu Rwanda kuri uyu wa gatatu yakiriye icyiciro cya mbere cy’inkingo z’icyorezo cya COVID-19. Zabonetse binyuze muri gahunda y'Umuryango w'Abibumbye yo gufasha ibihugu kubona inkingo z’iki cyorezo yiswe “COVAX.”
Ku ikubitiro inkingo 240,000 ni zo zagejejwe mu Rwanda. Zakozwe n'ikigo AstraZeneca cy'Abongereza n'Abasuwisi. Mu bayobozi baje kwakira izi nkingo, harimo minisitiri w’ubuzima w’u Rwanda Dr Ngamije Daniel, n'umuhuzabikorwa w’umuryango w’Abibumbye mu Rwanda Fode cola Bellomo.
Ministre w’ubuzima Dr Ngamije Daniel yavuze ko gahunda yo kwakira inkingo itangiye kandi izahagarara Abanyarwanda bose bamaze gukingirwa. Yavuze ko ku kubitiro izi nkingo zihabwa abantu bose bakora mu bigendanye n’ubuzima kuva ku bajyanama b’ubuzima, kugeza ku baganga bo mu bitaro bikuru, abakozi basanzwe bafasha mu kwirinda Covid-19, n’abantu basanzwe bafite indwara zidakira.
Nyuma yo kwakira izo mu bwoko bwa AstraZeneca, ku mugoroba wo kuri uyu wa gatatu harakirwa izo mu bwoko bwa Pfizer zingana na 102,960. Minisitiri w'ubuzima yavuze ko u Rwanda rufite intego yo gukingira Abanyarwanda bakabakaba Miliyoni 8, ko ntawe ugomba kugira impungenge.
Ministeri y’ubuzima yari iherutse gutangaza ko hagati y’ukwezi kwa 2 kugeza mu kwa gatanu, izaba imaze kwakira inkingo zisaga 800,000. U Rwanda rubaye igihugu cya kane muri Afurika gihawe inkingo za Covid-19 muri gahunda ya Covax, nyuma ya Ghana, Nijeria na Côte d’Ivoire.
Facebook Forum