Mu Buyapani, ishyirahamwe ry'abaganga rya mbere rikomeye, Tokyo Medical Practitioners Association, rirasaba ko imikino ya Olempike isubikwa kubera icyorezo cya Covid 19.
Hasigaye amezi abiri gusa kugira ngo imikino Olempike ya 24 yo mu ki itangire i Tokyo, umurwa mukuru w'Ubuyapani. Iteganyijwe guhera kuri 23 y'ukwa karindwi kugera ku itariki ya 8 y'ukwa munani muri uyu mwaka. Yagombaga kuba yarabaye mu mwaka ushize, ariko yigizwayo mu gihe cy'umwaka kubera icyorezo cya Covid 19.
Ubu nabwo, Covid 19 iraca ibintu bikabije i Tokyo, ku buryo guverinoma yayishyize, yo n'izindi ntara ziyikikije, mu mategeko y'ibihe bidasanzwe.
Ishyirahamwe ry'abaganga b'abadogiteri b'i Tokyo, rigizwe n'abanyamuryango barenga 6,000, bandikiye ibaruwa ifunguye minisitiri w'intebe, Yoshihide Suga, bamusaba kuganira na Komite Mpuzamahanga Olempike, CIO mu magambo ahinnye y'Igifaransa, kugira ngo barebere hamwe niba imikino ikwiye gusubikwa.
Uretse ko imikino ishobora kuba impamvu yo gukwirakwiza Covid kurushaho, basobanura ko n'ubushobozi bw'ibitaro by'i Tokyo bwarengewe n'umubare munini cyane w'abarwayi ba Covid 19. Bityo, ntibyabasha kwakira abandi barwayi.
Uretse abaganga, n'abaturage 83% ntibashyigikiye iyi mikino. 43% muri bo bavuga ko ikwiye kuburizwamo burundu, naho 40% bo basanga ikwiye kongera gusubikwa gusa. Bikubiye mu bipimo byo muri rubanda byatangajwe na kimwe mu binyamakuru bikomeye mu Buyapani cyitwa Asahi Shimbun.
Facebook Forum