Uko wahagera

Rwanda: Polisi Yafunze 100,000 Bishe Amabwiriza yo Kwirinda Covid 19


CP John Bosco KABERA, Umuvugizi wa Polisi y'u Rwanda

Polisi yo mu Rwanda iratangaza ko mu byumweru bibiri bishize yataye muri yombi abantu babarirwa mu bihumbi ijana barenze ku mabwiriza yo kwirinda Covid19.

Umuvugizi wa Polisi CP Jean Bosco Kabera watangaje iyo mibare akomeza gusaba abantu ko bubahiriza amabwiriza uko bikwiye.

Ufatiye ku bitangazwa na polisi mu Rwanda, byumvikana ko ibi byumweru bibiri birangiye byakomereye benshi mu kubahiriza ingamba ziheruka gushyirwaho n’ubutegetsi mu mugambi wo guhangana n’icyorezo COVID-19. Imwe muri izo ngamba yakunze kugorana cyane ku batuye umujyi wa Kigali ni iyo kuguma mu rugo.

Uretse gahunda ya 'guma mu rugo' ku batuye umurwa mukuru w’u Rwanda, mu byumweru bibiri bishize nta n’uwari wemerewe kurenga akarere ajya mu kandi ku batuye hanze yawo atabisabiye uburenganzira. Umuvugizi wa polisi akavuga ko n’abasabaga impushya batazikoreshaga uko bikwiye.

Ubusanzwe abafatwa barenze ku mabwiriza polisi ibajyana ahabugenewe nko mu ma stade n’ahandi bagataha. Byibura ucibwa ihazabu rito ni amafaranga ibihumbi 10 by’amanyarwanda.

Abahanga mu buvuzi bemeza ko uko abaturage batangiye bubahiriza ingamba basanga barushaho kudohoka imunsi ku wundi. Dr Menelas Nkeshimana uba mu itsinda ry’igihugu rishinzwe guhangana na COVID-19 aherutse kubibwira Ijwi ry’Amerika ko imwe mu mpamvu zaba zibibatera harimo no kurambirwa kubahiriza amabwiriza kju ruhande rw'abaturage.

Imwe mu ngamba zikunze kugora abatari bake ni gahunda ya guma mu rugo. Iyi abahanga mu buvuzi bayifata nk’imwe mu nkingi ya mwamba mu gukumira ikwirakwizwa ry’icyorezo COVID-19. Iyi ni nayo ikunze kugonga ab’amikoro make barya aruko bakoze.

Ku rundi ruhande hari n’abasanga iyi gahunda ya guma mu rugo iba idakwiye cyane ku bihugu bikennye.

Polisi itangaje ibi mu gihe habura amasaha make ngo guverinoma yongere ivugurure izindi ngamba nshya zijyanye no kwirinda COVID-19. Icyakora ibigaragara mu mbuga nkoranyambaga byo biboneka ko benshi bakomeje kwinuba cyane kuri gahunda ya guma mu rugo. Baribaza niba izi ngamba zashyizweho zishobora gukomeza cyangwa se zimwe mu zo binubira ziza kuvanwaho. Byose biri mu biganza bya guverinoma.

Hagati aho mu mujyi wa Kigali ho bari muri guma mu rugo, ubutegetsi bukomeje gutanga ibiribwa mu cyiciro cya kabiri ku bababaye kurusha abandi. Burabarura abaturage basaga ibihumbi 500 bakeneye kugaburirwa. Imibare y’inzego z’ubuzima igaragaza ko kuva Covid-19 yaduka ku butaha bw’u Rwanda, abasaga ibihumbi 15 bamaze kwandura, abarenga ibihumbi 10 bo barakize, hafi ibihumbi bitanu baracyarwaye barimo 18 barembye, naho 198 bo kimaze kubahitana .

Facebook Forum

XS
SM
MD
LG