Uko wahagera

Rwanda: Leta Yategetse Amavuriro Yayo Yose Kwakira Abarwaye Covid-19


Umukozi w'Ikigo cy'Igihugu Gishinzwe Ubuzima mu Rwanda - Rwanda Biomedical Center (RBC) mu gikorwa cyo gupima virusi ya Corona Kigali, taliki 11z'ukwa karindwi 2020.

Leta ivuga ko iki cyemezo gifashwe nyuma yaho ibigo byari bisanzwe byita ku banduye Covid-19 bihuye n’umubare munini wabanduye bikananirwa.

Minisiteri y’ubuzima mu Rwanda yategetse ibitaro byose bya Leta ko guhera kuri uyu wa Gatandatu byajya bivura abarwayi ba COVID-19 hagendewe ku bwishingizi bafite ubwo ari bwo bwose.

Ministeri y’ubuzima itangaza ko iki cyemezo gifashwe nyuma yaho ibigo byari bisanzwe byita ku banduye Covid-19 bihuye n’umubare munini wabanduye bikananirwa.

Leta y' u Rwanda yafashe iki icyemezo nyuma y'amezi agera kuri 11 ari yo yishingira abarwayi ba COVID-19 haba mu kubishyurira, gufatwa ibipimo ndetse no kubitaho mu gihe bakurikiranwa n’abaganga.

Ariko umubare w'abandura Covid 19 ugenda wiyongera umaze kurenga ubushobozi bw'ibigo leta yari yarashyiriyeho kwita by'umwihariko kuri icyo kibazo

Mu minsi ibiri gusa ku wa gatanu no ku wa gatandatu abantu 534 banduye Covid-19 kandi bagaragaye hafi mu turere twose tw’igihugu.

Mu byo abantu banyuranye bakomeje kugaragaza bikekwa nk’impamvu yiryo zamuka n’ukudakurikiza amabwiriza y’ubwirinzi yatanzwe na Ministeri y'ubuzima.

Hirya no hino usanga abaturage batambara agapfukamunwa, hakagira n’abakambara kuko batinye gusa inzego z’ubuyobozi.

Ministeri y'ubuzima yemeza ko ibigo nderabuzima byahawe ibikoresho bihagije ku buryo byiteguye kwakira no kwita ku banduye Covid 19

Kuva mu ntangiriro z’uyu mwaka, ministeri y’ubuzima yahaye uburenganzira ibigo Nderabuzima bwo gupima Covid-19. Mu mibare igenda itangazwa buri mugoroba, hari iba iyavuye muri ibyo bigo, no mu mavuriro yigenga yahawe ubwo burenganzira.

Uretse amavuriro ya Leta yamaze guhabwa uburenganzira bwo kuvura Covid-19, Leta yanahaye uburenganzira kuva mu kwezi kwa 12 k’umwaka ushize amavuriro yigenga 42 ari hirya no hino mu gihugu uburenganzira bwo kuba yapima Covid-19.

Kugeza ubu mu Rwanda harabarurirwa abanduye Covid-19 bagera 10850, muri bo abagera kuri 7193 bamaze gukira, mu gihe abangana na 140 yamaze kubahitana.

Mu Rwanda abangana na 3571 nibo bakirwaye, abagera ku 2800 bakaba barwariye mu ngo zabo.

Facebook Forum

XS
SM
MD
LG