Uko wahagera

Rwanda: Mugesera Yihannye Umucamanza Kaliwabo mu Bujurire


Mugesera Leon

Bwana Leon Mugesera wagombaga gutangira kuburana urubanza rwe mu rukiko rw'ubujurire yihannye umwe mu bacamanza maze bituma urubanza rusubikwa.

Yihannye Charles Kaliwabo wigeze kuba Perezida w'urukiko rukuru amucinja ko amufiteho urwango. Mugesera aregwa ibyaha bya jenoside n'ibyibasiye inyokomuntu bikomoka ku ijambo yavugiye ku Kabaya mu 1992.

Umucamanza akimara kwibutsa uko iburanisha ryagomba kugenda Bwana Leon Mugesera yamubwiye ko mbere ya byose akeneye kumenya amazina y’abacamanza bose bagomba kumuburanisha na cyane ko ngo aho yari yicaye atababonaga neza. Yanamutegetse ko agomba kuburana ahagaze imbere y’inteko y’abacamanza ariko Mugesera avuga ko kubera impamvu z’uburwayi no ku rwego rwa mbere yaburanaga yicaye.

Umushinjacyaha Claudine Dushimimana na we yemeje ko Mugesera yaburanaga yicaye ariko ko icyemezo cyafatiwe ku rukiko rukuru kitakurikizwa mu rukiko rw’ubujurire. Umucamanza yiherereye akanya gato maze yanzura ko Mugesera agomba kuburana yicaye nk’uko byagenze ku rwego rwa mbere.

Gusa Mugesera ntiyatsimbutse ku nzitizi ye yo kumenya amazina y’abagomba kumuburanisha kuko avuga ko aburana mu rukiko rukuru Bwana Richard Muhumuza yari umushinjacyaha mukuru none ubu yabaye umucamanza mu rukiko rw’ubujurire. Avuga ko uwo n’abandi kubihana byamugora abaye atabazi.

Umucamanza ukuriye inteko iburanisha yatanze akanya maze Me Jean Felix Rudakemwa na Mugesera batembera imbere y’abacamanza bagenda bababaza amazina mu ijwi ryo hasi barangije basubira mu byicaro byabo.

Umucamanza ati “ Mwasanze bimeze bite?” Mugesera ati “ Bimeze neza ariko ku mucamanza umwe haracyariho ikibazo” Uwo ni Bwana Charles Kaliwabo wahoze ari Perezida w’urukiko rukuru rwaburanishije Leon Mugesera.

Uregwa yahise amwihana maze umucamanza amusaba gusobanura impamvu z’ubwihane bwe. Mugesera yisunze ingingo z’amategeko yabwiye urukiko ko iyo umucamanza yihanwe umwanditsi yandika ko habayeho ubwihane gusa inteko iburanisha igasubika urubanza nta mpaka hanyuma impamvu zikazatangwa mu nyandiko zikazasuzumwa.

Urukiko rwakomeje kumwibutsa ko icyo rumusaba ari impamvu yihannye umucamanza Kaliwabo bitarinze kwinjira mu bisobanuro byimbitse. Mugesera ati “ Ibyo byazana impaka kandi itegeko rivuga ko nta mpaka zigomba kubaho”. Yabwiye urukiko ko hari ibyo yashakaga kurwongorera ariko umucamanza amusaba kubivugira mu iburanisha.

Ntiyasobanuye imiterere cyangwa inkomoko y’urwango ashinja Kaliwabo gusa mu mpamvu yatanze yavuze ko zirimo iz’urwango ndetse ngo na bimwe mu byo yigeze gukora ku rubanza rwa Mugesera akiburanishwa n’urukiko rukuru.

Me Jean Felix Rudakemwa umwunganira yabwiye urukiko ko amategeko aha Mugesera uburenganzira bwo kwihana umucamanza. Avuga ko bagiye kureba impamvu z’ubwihane zikajya mu nyandiko zigashyikirizwa urukiko.

Umucamanza yategetse ko bakurikiza ibyo amategeko ateganya. Amategeko ateganya ko iyo habayeho impamvu z’ubwihane zishyikirizwa umucamanza mu gihe kitarenze umunsi umwe.

Mu iburanisha rya none hagombaga kureberwa hamwe impamvu z’ubujurire. Ababuranyi bombi ndetse n’urukiko bagombaga no kwigira hamwe ingengabihe y’uru rubanza.

Facebook Forum

XS
SM
MD
LG