Uko wahagera

RDC: Abarenga Miliyoni 27 Bazahura n'Ibibazo by'Inzara


Ishami ry'Umuryango w'Abibumbye ryita ku biribwa (PAM) riratangaza ko Abantu babarirwa muri miliyoni 27.3 muri Repuburika ya demokarasi ya Congo bazahura n’ibibazo by’inzara kandi ko bakeneye infashanyo y’ibiribwa yihutirwa.

Raporo iheruka ya ONU, isesengura uburemere bw’ikibazo cyihutirwa cy’ibiribwa kw’isi, yasanze kimwe cya gatatu cy’abaturage ba Congo, bafite ibiribwa bike ku buryo bukabije.

PAM itanga ibiribwa byo kurengera ubuzima bw’abantu barenga miliyoni 27 bashonje, ivuga ko iki kibazo cyugarije ikiremwa muntu cyaturutse ahanini ku bikorwa bya muntu. Ikavuga ko ubushyamirane ari bwo ahanini nyirabayazana ku kibazo cy’inzara muri Repuburika ya demokarasi ya Congo. Intara zo mu burasirazuba n’iyo hagati ya Kasayi, ni zo zibasiwe n’ubushyamirane.

Umuvugizi wa PAM, Tomson Phiri, avuga ko hari n’izindi mpamvu zituma ikibazo cy’inzara kiba insobe, kimwe kikaba ubukungu bwa Congo bwaguye, bwagezweho n’ingaruka za COVID-19. Avuga ko inyuma y’imibare yagaragaye hihishe imiryango itabarika, itabasha kugera ku butaka bwayo cyangwa iyo byabaye ngombwa ko ihungisha ubuzima bwayo, ikaba irebera abana bayo barwara bitewe no kubura ibiribwa. Uwo mukozi wa PAM yabonanye n’imiryango yasubiye mu midugudu yayo igasanga ingo zarasenyutse n’imyaka mu mirima yarasahuwe n’amazu yarahiye agakongoka.

Uyu muvugizi wa PAM Phiri avuga ko abantu benshi ubu nta kindi kibatunze kitari imyumbati cyangwa isombe itogosheje mu mazi. Akavuga ko muri miliyoni 5.2 z’abantu bataye ibyabo imbere mu bihugu, abafite ibibazo by’inzara kurusha abandi, abenshi bari muri Afurika. Akongeraho ko bamwe mu bihumbi birenga 500 b’impunzi mu gihugu cya Congo, ahanini baturuka muri Repuburika ya Centrafurika, bamerewe nabi by’umwihariko. Abandi baturage batorohewe avuga ko barimo abagore bayoboye ingo, n’abana bo mu miryango ikennye yo mu mijyi hamwe n’abana bafite indwara zituruka ku mirire mibi.

Porogaramu ya ONU yita ku biribwa, PAM, yatakambye isaba miliyoni 661 z’amadolari yo gushyira muri gahunda zo kurengera ubuzima muri uyu mwaka. Ivuga ko ayo mafaranga azatuma miliyoni z’abantu bababaye kurusha abandi, batagira ibibazo biremeye by’inzara, ukwiheba, ndetse bikaba byabarinda urupfu.

Facebook Forum

XS
SM
MD
LG