Mu kiganiro ngarukamwaka n’abanyamakuru, perezida w’Uburusiya Vladimir Poutine yavuze ko yiteguye amasezerano mashya na Leta zunze ubumwe z’Amerika yerekeye intwaro azwi nka “START”.
Muri icyo kiganiro Perezida Poutine yavuze ko kwemeza ibirego kuri perezida w’Amerika Donald Trump byari bishingiye ku “Nzozi”.
Avugira i Moscow uyu munsi taliki 19 y’ukwezi kwa 12 mu nama y’umwaka n’abanyamakuru, Poutine yavuze ko yari yiteze ko Trump aguma ku butegetsi n’ubwo abadepite b’Abademokrate mu nteko ishinga amategeko y’Amerika, ejo tariki 18 y’ukwezi kwa 12 batoye bahamya ibirego Sena izamukurikiranaho.
Perezida Poutine yavuze ko ishyaka ryatsinzwe amatora rikomeje urugamba mu bundi buryo. Yongeyeho ko Uburusiya bwiteguye kwumvikana n’Amerika ku masezerano yerekeye intwaro “START” n’ubwo nta gisubuzo bwari bwabona ku byo bwasabye.
Poutine yagize ati, hatabaye ayo masezerano, nta kintu kw’isi kizahagarika umuvuduko mw’ikorwa ry’intwaro ati kandi “ndakeka ari ikintu kibi”.
Mu ntangiriro z’iki cyumweru, Perezidansi y'Uburusiya yavugaga ko abanyamakuru babarirwa mu 1,895 biyandikishirije kujya muri iyo nama itangazwa kuri televisiyo mu mpera z’umwaka. Ni wo umwanya Poutine afata buri gihe, kugira ngo ahumurize Abarusiya. Bivugwa ko ari n’uburyo bwo kwereka Amerika n’amahanga uko Uburusiya buhagaze.
Facebook Forum