Uko wahagera

Perezida Museveni wa Uganda Yatsinze Amatora


Perezida Yoweri Museveni wa Uganda

Perezida Yoweri Museveni umaze imyaka 35 ku butegetsi atangiye manda ya gatandatu y'indi myaka itanu.

Komisiyo y'Igihugu y'Amatora muri Uganda kuri uyu wa gatandatu yatangaje ko Perezida Museveni wa Uganda yatsinze amatora aheruka kuba muri icyo gihugu.

Museveni yatsinze abandi bakandida 10 bahataniraga uwo mwanya ku majwi 58.64 ku ijana, angana na miliyoni 5.85 z'abatoye bose.

Bivuze ko uyu mugabo umaze imyaka 35 ku butegetsi agiye gutangira indi manda ya gatandatu y'imyaka itanu.

Robert Kyagulanyi uzwi ku izina rya Bobi Wine umwe mu bakandida bakomeye bari bahanganye yabonye amajwi 34.83 ku ijana, angana na miliyoni 3.48 y'abatoye bose.

Umunyamakuru w'Ijwi ry'Amerika uri i Kampala mu murwa mukuru wa Uganda yavuze ko umutekano wakajijwe cyane abapolisi n'abasirikare bakwiriye mu bice byose biteguye kuburizamo umugambi uwo ari wo wose w'abashobora guhakana ibyavuye mu matora mu buryo buteza umutekano muke.

Ntiharamenyekana icyo abakandida batsinzwe amatora bateganya gukora kugeza ubu, cyakora Bobi Wine waje ku mwanya wa kabiri yakomeje kuvuga ko afite ibimenyetso simusiga bigaragaza ko abamushyigikiye babujijwe uburenganzira bwabo mu gihe cy'itora kandi ko amajwi yaba yaribwe.

Inzego z'ubutabera muri Uganda ziteganya ko mu gihe habayeho impamvu zituma umukandida atanyurwa n'umwanzuro wa komisiyo y'igihugu y'amatora, urukiko rushobora kwakira ikirego cye.

Umwe mu basesenguzi bavuganye n'ijwi ry'Amerika yavuze ko hakiri kare kumenya niba hari ababiteganya.

Facebook Forum

XS
SM
MD
LG