Uko wahagera

ONU: Urwanko Rufatiye ku Rukoba Rurasibije Amerika


Michelle Bachelet atwara akanama ka ONU kajejwe agateka ka zina muntu

Umukuru w’akana k’ishirahamwe mpuzamakungu kajejwe agateka ka zina muntu yavuze ko igandagurwa rya George Floyd ryerekana ukuntu urwanko rufatiye ku rukoba rugisibije muri Reta Zunze Ubumwe za Amerika.

Michelle Bachelet, uyu musi ku wa gatatu yashimye urubanza n’igihano cafatiwe umupolisi Derek Chauvin yagandaguye George Floyd. Yavuze kandi ko urwo rubanza rwerekanye ko inzira yo kurangiza urwanko n’ikumirwa ry’abirabirabure muri Reta Zunze Ubumwe za Amerika, ikiri ndende.

Ejo ku musi wa kabiri, Derek Chauvin yahoze ari umupolisi mu gisagara ca Minneapolis, muri reta ya Minnesota yaragiriwe n’ivyaha vyo kugandagura George Floyd yakoze mu kwezi kwa gatanu mu mwaka w’2020.

Umurwi w’abashingantahe n’abapfasoni 12 batowe kwunganira umucamanza, basanze Chauvin yarakoze ivyaha bitatu vyose yagirijwe. Uyo mugabo w’imyaka 45 yahoze ari umupolisi, ashobora gupfungwa imyaka 40.

Umukuru w’akanama k’ishirahamwe mpuzamakungu kajejwe agateka ka zina muntu, Bachelet yavuze ko ivyaha uyo mugabo yagirijwe, bitari agaseseshwa rumuri. Yongeye avuga ko ubutungane bwari kuba buyovye iyo butamwegekako ivyo vyaha vyose.

Yateye akamo kandi gasaba ko imanza zose z’ubwicanyi bwakozwe n’abapolisi zikwiye gushirwa imbere ya sentare, ngo kuko igihe co kudahana ivyaha nk’ivyo gikwiye guhagarara.

  • 16x9 Image

    Diane Nininahazwe

    Diane Nininahazwe akorera igisata c'Ikirundi n'Ikinyarwanda kuva mu 2015. Imbere yo gutangura gukorera ku cicaro gikuru i Washington-DC nk'umumenyeshamakuru n'uwushinzwe imbuga ngurukanabumenyi z'ico gisata (Digital Lead), yakoreye Ijwi ry'Amerika mu Burundi, i Buraya ku murwa mukuru w'Ubudagi i Berlin, no mu gisagara ca Los Angeles muri Reta ya California iri mu mu burengero bushira ubumanuko bw'Amerika. Umwuga wo kumenyesha amakuru yawutanguye mu 2004 aho yakoreye ibimenyeshamakuru bitandukanye birimwo iradiyo yigenga Bonesha Fm n'ikimenyeshamakuru c'Abafaransa, Le Point Afrique. Imbere yo gukorera Ijwi ry'Amerika, Nininahazwe yakora ibiganiro vy'amashirahamwe yigenga arimwo iryo mu Buholande, La Benevolencija, iry'Abanyamerika, PSI, iry'Abadagi, EIREN, na CED-Caritas Burundi. Kuva mu 2011, ari mu murwi w'abamenyeshamakuru igisata ca ONU kiraba ivy'ubutunzi, UNECA, gikoresha nk'abigenga mu gukurikirana amanama mpuzamakungu ku vy'ihindagurika ry'ibihe n'iterambere rirama. Afise impamyabushobozi ya kaminuza mu gisata co kumenyesha amakuru mu bijanye n'iterambere (Communication Pour le Développement), n'urupapuro mu vy'umwuga wo kumenyesha amakuru muri rusangi (Multimedia Journalism). Amaze gutahukana ubushimwe butandukanye mu vy'ukumenyesha amakuru burimwo bubiri mpuzamakungu.

Facebook Forum

XS
SM
MD
LG