Ibiro bya ONU muri Tunisiya byavuze uyu munsi kuwa mbere ko bihanganyikishijwe n’ibikomeje kuvugwa kw’ihohotera rikomeye rya polisi mu rugomo rukorerwa abigaragambya bamagana ibyo bikorwa bya polisi mu majoro atandatu mu murwa mukuru Tunis.
Imyigaragambyo yadutse nyuma y’uko hagaragaye videwo yerekana umupolisi yambika ubusa kandi agakubita umusore bigateza uburakari ahantu henshi.
Iyo videwo yanenzwe n’amashyaka ya politiki n’imiryango iharanira uburenganzira bwa muntu na Perezida Kais Saied. Minisitiri w’intebe Hichem Mechichi, yavuze ko abofisiye babigizemo uruhare batawe muri yombi kandi ko ibyabaye bitemewe.
Mw’itangazo, ibiro bya ONU bishinzwe uburenganzira bwa muntu muri Tunisiya, bigira biti: “Urwo rugomo rukomeye cyane kandi rukomeje gukorwa kuva mu ntangiriro z’uyu mwaka, rwerekana ko hakomeje kuba imikorerere mibi imbere muri serivisi z’umutekano”.
Mu myigaragambyo yo mu kwezi kwa mbere, polisi yataye muri yombi abantu barenga 2,000 abenshi ni abari batarageza ku myaka y’ubukure. Imiryango iharanira uburenganzira bwa muntu yavuze ko amagana muri abo bafashwe nabi cyane, bakorerwa iyica rubozo.
Minisitiri w’ubutegetsi bw’igihugu yavuze ko urugomo rubarwa ku bantu ku giti cyabo ko rutari mu ngamba za minisiteri kandi ko mu myaka yashize, yatangije gahunda zo kuvugurura ibijyanye n’umutekano. Impirimbanyi z’uburenganzira bwa muntu, zavuze ko ihohotera rikorwa na Polisi ryasubije inyuma ibyagezweho na demokarasi kuva ingoma y’igitugu ya perezida Zine El Abidine Ben Ali ihiritswe mu myaka icumi ishize.
Facebook Forum