Muri Nijeriya, abanyeshuri bagera mw’i 150 baburiwe irengero nyuma y’uko abagabo bitwaje intwaro bagabye igitero kw’ishuri ryo mu majyaruguru y’uburengerazuba bwa Leta ya Kaduna. Ibyo, umubyeyi n’umuyobozi babitangarije ibiro ntaramakuru byo mu Bwongereza Reuters, uyu munsi kuwa mbere.
Icyo gitero cyagabwe mw’ijoro ryakeye kw’ishuri ryisumbuye ry’idini y’Ababatisite muri Leta yo mu majyepfo y’igihugu, Kaduna. Abanyeshuri byibura 25 babashije gutoroka. Abandi hari ubwoba ko baba bashimuswe nk’uko Pasiteri John Hayab, washinzwe iryo shuri yabivuze. Umwana we w’umuhungu wiga muri iryo shuri, ari mu babashije gutoroka.
Polisi yavuze ko iza gusohora itangazo rivuga kuri iki gitero mu masaha ari imbere. Abanyeshuri 180 biga muri iryo shuri ryisumbuye bacumbikiwe kandi bari hafi gukora ibizami nk’uko Hayab ufite umwana w’umuhungu w’imyaka 17 watorotse n’umwe mu babyeyi, Hassana Markus ufite umukobwa waburiwe irengero babivuze.
Hari amakuru yageze kuri Reuters ko abategetsi bashinzwe umutekano bagose ishuri nyuma y’igitero, cyabaye hagati ya saa tanu z’ijoro ejo ku cyumweru na saa kumi za mu gitondo uyu munsi kuwa mbere.
Abagabo bafite intwaro bazwi nk’amabandi mu karere, bashimuta abanyeshuri bagamije ingurane aho mu majyaruguru y’uburengerazuba bwa Nijeriya ahanini muri leta ya Kaduna. Batwaye abanyeshuri babarirwa mu gihumbi kuva mu kwezi kwa 12 umwaka ushize. Abarenga 150 baracyaburirwa irengero.
Iryo shimita rinibasiye imihanda, amazu atuwe n’abantu ku giti cyabo yemwe n’ibitaro. Mw’ijoro ry’ejo ku cyumweru, abagabo bafite imbunda bashimuse abantu batandatu harimo n’umwana w’umwaka umwe, babakuye mu bitaro biri mu majyarugu muri Leta ya Kaduna.
Facebook Forum