Muri Myanmar, abaturage basubiye mu myigaragambyo yo mu mihanda ari ibihumbi n'ibihumbi. Bakomeje kwamagana kudeta yo ku itariki ya mbere y'ukwezi kwa kabiri gushize.
Ejo kuwa gatatu hashize, imyigaragambyo yo mu mihanda yarasibiye, ahubwo abaturage bakora imyigargambyo bise "iya bucece." Bigumiye mu rugo, imirimo n'ubucuruzi byose birahagarara.
Uyu munsi, bagarutse mu mihanda ari uruvunganzoka. Abasilikali babarashe mu mijyi itandukanye. Ibinyamakuru byo muri Myanmar bivuga ko, muri rusange, abantu bane babiguyemo.
Ishyirahamwe ryo gufasha imfungwa ryo muri Myanmar (Association d'assistance aux prisonniers politiques) rivuga ko abantu bose hamwe bamaze kwicwa kuva ku munsi wa mbere wa kudeta bararenga 286. Naho igisirikari cyo kivuga ko ari 164. Umuto muri bo ni umwana w'umukobwa w'imyaka irindwi y'amavuko. Yishwe ejobundi kuwa kabiri i Mandalay, umujyi wa kabiri mu bunini, hagati no hagati mu gihugu.
Kuwa mbere w'iki cyumweru, Leta zunze ubumwe z'Amerika n'Umuryango w’ubumwe bw’ibihugu by’Uburayi bafatiye ibihano abategetsi ba gisirikari bakoze kudeta muri Myanmar, barimo umukuru wabo, Général Min Aung Hlaing, n'abahungu be babiri.
Ku rutonde rw'ibihano, uyu munsi Leta zunze ubumwe z'Amerika yongeyeho ibigo by'ubucuruzi by'ingabo bikomeye bibiri, ari byo Myanmar Economic Holdings Public Company Limited na Myanmar Economic Corporation Limited.
Facebook Forum