Muri Alijeriya abaturage baramukiye mu matora y'abagize Inteko ishinga Amategeko nyuma y'imyaka ibiri icyo gihugu kirangwamo imvururu, nubwo impirimbanyi za demokarasi muri icyo gihugu zishishikariza abaturage kutayitabira.
Aya ni yo matora ya mbere abaye kuva Perezida Abdelaziz Boutefrika yahirikwa ku butegetsi mu mwaka wa 2019 nyuma y'imyaka 20 yari amaze ari perezida.
Yahiritswe ku butegetsi nyuma y'imyigaragambyo ishingiye ku bibazo bya ruswa, ibura ry'akazi n'igitugu mu butegetsi.
Abashyigikiye ubutegetsi bahamagariye abaturage kwitabira aya matora bavuga ko ari ingenzi mu kugarura ituze mu gihugu. Perezida Abdelmadjid Tebboune yasezeranije abaturage "Arijeriya nshya" bituma abakandida bakiri bato n'abandi batari basanzwe muri politike biyamamaza.
Abakandida ku mwanya w'abadepite bararenga 20,000 biyamamariza imyanya 407 mu nteko Ishinga Amategeko. Abagera kuri 50 ku ijana bariyamamaza ku giti cyabo. Abasigaye bose bari kuri lisiti z'amashyaka.
Ibiro by'amatora birafunga saa moya za nijoro.
Facebook Forum