Ministri w'ubutegetsi bw'igihugu mu Bwongereza yategetse ko uburyo abadepite bacungirwa umutekano buvugururwa vuba na bwangu nyuma y'iyicwa ry'umwe mu badepite b'icyo gihugu kuri uyu wa gatanu.
Depite David Amess warimo guhura n'abaturage ahagarariye mu burasirazuba bwa London, yasogoswe inshuro nyinshi mu bigaragara nk'igico cy'iterabwoba ry'abatsimbaraye ku mahame ya Isilamu.
Uyu mudepite wari ufite imyaka 69 ni uwa kabiri wishwe muri iki gihugu mu gihe cy'imyaka itanu. Urupfu rwe rwateye ubwoba n'uburakari mu gihugu hose, abanyapolitike batandukanye bamushimagiza nk'umudepite warangwaga n'umwete, wanze umwanya w'ubuministri muri leta kugira ngo yite ku baturage ahagarariye n'ibyo bakeneye.
Umuvugizi wa ministeri yatangaje ko ministri w'ubutegetsi bw'igihugu Priti Patel wayoboye inama y'inzego z'umutekano mu gihugu kuri uyu wa gatandatu yategetse ko uburyo abadepite bacungirwa umutekano buvugururwa.
Perezida w'inteko ishinga amategeko na we yavuze ko ashaka gusuzuma ingamba zo kurinda umutekano ku badepite nyuma y'iyicwa rya Depite Amess wiciwe mu cyumba cy'urusengero mu mujyi wa Leigh-on-Sea uri mu rugendo rw'isaha imwe uvuye mu murwa mukuru London.
Facebook Forum