Mu Buhinde Covid 19 Ntiracogora

Ubuhinde bukomeje kuzahazwa n'ikiza cya Covid 19 uko mibare y'abandura buri munsi igenda yiyongera. N'ubwo iki gihugu ari cyo gikora inkingo nyinshi ku isi, ikigo gikora inkingo muri icyo gihugu kiratangaza ko mu babarirwa muri miliyari 1.3 batuye icyo gihugu, abagera kuri babiri ku ijana gusa ari bo babonye urukingo rwa Covid 19.

Ubuhinde bwagerageje kongera umubare w'abahabwa urukingo butegeka ko kuva ku myaka 18 kuzamura bemerewe kuruhabwa, ariko ahantu henshi baravuga ko batarabona inkingo.

Abantu benshi baranenga Adar Poonawalla, umuyobozi mukuru w'ikigo gikora inkingo mu Buhinde kubera ikibazo cy'ubuke bw'inkingo za Covid 19. Uyu mugabo ubu uri mu Bwongereza yari yabanje gutangariza ikinyamakuru The Times cyo muri icyo gihugu ko atari busubire mu Buhinde kubera igitutu n'umwuka mubi bikomeje kwiyongera, rubanda bamushinja kuba nyirabayazana w'ibibazo byo kubura inkingo muri icyo gihugu. Gusa nyuma yo kunengwa cyane ku mbuga nkoranyambaga yisubiyeho atangaza ko azagaruka mu Buhinde mu minsi mike.

Kuri iki cyumweru ministeri y'ubuzima mu Buhinde yatangaje ko umubare w'abandura virusi ya Corona buri munsi wagabanutse uva ku 400,000 byagaragaye ku munsi w'ejo ukagera ku 392,448 mu masaha 24 ashize.

Igihugu cya Taiwan cyatangaje ko cyohereje ubufasha bw'ibikoresho bikenewe mu Buhinde, harimo n'umwuka wa Oxygen wo gufasha abarwayi guhumeka.

Muri Brazil ho ababarirwa mu bihimbi birengagije uburyo iyo ndwara ikomeje guhitana abatari bake muri icyo gihugu, biroha mu mihanda mu mijyi ya Sao Paulo na Rio de Janeiro bagaragaza ko bashyigikiye Perezida Jair Bolsonaro udakozwa ingamba zo kwirinda iki kiza bamwe mu bayobozi b'intara n'imijyi baherutse gutangaza.

Covid 19 imaze guhitana abagera ku 400,000 muri iki gihugu harimo 2,600 bapfuye ejo ku wa gatandatu. Ni yo iza ku mwanya wa kabiri nyuma ya leta zunze ubumwe z'Amerika mu gupfusha abantu benshi bazira iki kiza.

Kugeza ubu ikigo cy'ubushakashatsi cya kaminuza ya Johns Hopkins muri Amerika kivuga ko muri iki gihugu abagera ku 576,600 bamaza guhitanwa n'iyi ndwara.