Uko wahagera

Minisitiri w'Intebe wa Isirayeli Yasuye Igihugu cya Misiri.


Minisitiri w'intebe wa Isirayeli, Naftali Bennett na perezida wa Misiri, Abdel Fattah al-Sissi

Minisitiri w'intebe wa Isirayeli, Naftali Bennett, uyu munsi yasuye igihugu cya Misiri. Ni rwo ruzinduko rwa mbere rw'umukuru wa guverima ya Israeli mu Misiri mu myaka irenga icumi.

Bennett, wafashe ubutegetsi mu kwezi kwa gatandatu muri uyu mwaka, yatumiwe na perezida wa Misiri, Abdel Fattah al-Sissi, mu kwezi gushize. Mu biganiro byabo, icya mbere, nk'uko itangazo rya perezidanse ya Misiri ribivuga, ni ukurebera hamwe uburyo bwo kuzura imishyikirano hagati ya Israeli na Palestina, yasinziriye kuva mu 2014. Gusa ababisesengura bemeza ko kubibyutsa biri kure, bitewe n'uko Naftali Bennett atigeze ahisha ko adashobora kwemera ko habaho igihugu cya Palestina cyigenga.

Icya kabiri mu biraniro bya minisitiri w'intebe wa Israeli na perezida wa Misiri ni intambara hagati ya Israeli n'umutwe wa Hamas uri ku butegetsi mu ntara ya Gaza muri Palestina. Nyuma y'iminsi 11 barwana mu kwezi kwa gatanu gushize, Misiri yabafashije kugera ku gehenge. Ariko mu mpera z'ukwezi kwa munani gushize no mu cyumweru gishize, Hamas yarongeye irasa ibisasu bya rokete muri Isirayeli, Israeli nayo yohereza indege z'intambara kurasa muri Gaza.

Minisitiri w'intebe wa Isirayeli wari uherutse gusura Misiri ni Benjamin Netanyahu mu kwezi kwa mbere 2011. Icyo gihe, uwari perezida wa Misiri, Hosni Mubarak, yamuhurije mu nama na perezida wa Palestina, Mahmoud Abbas, na Hillary Clinton wari minisitiri w'ububanyi n'amahanga wa Leta zunze ubumwe z'Amerika. Misiri ni cyo gihugu cya mbere cy'Abarabu cyagiranye amasezerano y'amahoro na Isirayeli mu 1979.

Facebook Forum

XS
SM
MD
LG