Uko wahagera

Macron: Amakungu Akwiye Guha Uburusiya Umurongo Ntarengwako


Prezida w'Uburusiya Vladimir Putin na Mugenzi wiwe w'Ubufaransa Emmanuel Macron

Prezida w’Ubufaransa Emmanuel Macron avuga ko amakungu yari abwirijwe gushiraho umurongo utukura Uburusiya butabwirijwe kurengako, bwaramuka buwurenze bugahanwa vy’akarorero.

Mu kiganiro Prezida Macron yahaye imboneshakure nyamerika, CBS, yavuze ko ubu ari bwo buryo bwonyene bwo kugarukana ku murongo Uburusiya. Uwo mutegetsi muri ico kiganiro yashimangiye ko ibihano bihabwa Uburusiya vyonyene bidakwiye, gutyo agasanga vyari bibwirijwe guherekezwa n’izindi ngingo zikarishe.

Muri ico kiganiro na CBS, Macron yavuze ko yemeranya na Prezida wa Reta Zunze Ubumwe z’Amerika, Joe Biden, ku ciyumviro ciwe c’uko hakenewe ibiganiro hagati y’amahanga na Prezida w’Uburusiya Vladmir Putin.

Amajambo ya Macron aje akurikira ibihano Amerika yafatiye Uburusiya ku wa kane w’indwi iheze, ibwagiriza kwivanga mu matora yabwo yo mu mwaka uheze no kuba bwarakoze ibitero bitandukanye ku buhinga bwa none bw’ibigo vya Reta y'Amerika, bugerageza kwiba amabanga yayo.

Mu bihano Amerika yafatiye Uburusiya, harimwo ukwirukana abadiplomate 10 b’ico gihugu ku butaka bw’Amerika. Uburusiya nabwo bwahavuye ku wa gatanu busubiriza mu ndumane Amerika, bwirukana abadipolmate bayo 10, bwongera busaba ambasaderi w’Amerika gusubira gato i Washington, akavugana n’inzego zimukurira.

Ibihano Amerika yafatiye Uburusiya ni vyo vya mbere bikarishe kuva icuka catangura kuba kibi hagati ya Amerika n'Uburusiya. Icuka kiri hagati y'Amerika n’Uburusiya ni co kandi kibi kurusha ibindi vyose vyahabaye kuva mu 1989.

  • 16x9 Image

    Diane Nininahazwe

    Diane Nininahazwe akorera igisata c'Ikirundi n'Ikinyarwanda kuva mu 2015. Imbere yo gutangura gukorera ku cicaro gikuru i Washington-DC nk'umumenyeshamakuru n'uwushinzwe imbuga ngurukanabumenyi z'ico gisata (Digital Lead), yakoreye Ijwi ry'Amerika mu Burundi, i Buraya ku murwa mukuru w'Ubudagi i Berlin, no mu gisagara ca Los Angeles muri Reta ya California iri mu mu burengero bushira ubumanuko bw'Amerika. Umwuga wo kumenyesha amakuru yawutanguye mu 2004 aho yakoreye ibimenyeshamakuru bitandukanye birimwo iradiyo yigenga Bonesha Fm n'ikimenyeshamakuru c'Abafaransa, Le Point Afrique. Imbere yo gukorera Ijwi ry'Amerika, Nininahazwe yakora ibiganiro vy'amashirahamwe yigenga arimwo iryo mu Buholande, La Benevolencija, iry'Abanyamerika, PSI, iry'Abadagi, EIREN, na CED-Caritas Burundi. Kuva mu 2011, ari mu murwi w'abamenyeshamakuru igisata ca ONU kiraba ivy'ubutunzi, UNECA, gikoresha nk'abigenga mu gukurikirana amanama mpuzamakungu ku vy'ihindagurika ry'ibihe n'iterambere rirama. Afise impamyabushobozi ya kaminuza mu gisata co kumenyesha amakuru mu bijanye n'iterambere (Communication Pour le Développement), n'urupapuro mu vy'umwuga wo kumenyesha amakuru muri rusangi (Multimedia Journalism). Amaze gutahukana ubushimwe butandukanye mu vy'ukumenyesha amakuru burimwo bubiri mpuzamakungu.

Facebook Forum

XS
SM
MD
LG