Uko wahagera

Loni Yahungishije Impunzi 325 z'Abanyalibiya


Intumwa y'Umuryango w'Abibumbye muri Libya Ghassan Salame, mu kiganiro n'abanyamakuru i Tripoli taliki 6, z'ukwa kane 2019.

Umuryango w’Abibumbye (ONU) wahungishije impunzi z’abanyalibiya zigera kuri 325, ubakuye mu kigo cya leta bari bafungiyemo i Tripoli. Ni nyuma y’uko bamwe bahohotewe ubwo bamaganaga imibereho mibi babamo.

Imirwano hagati y'ubutegetsi bushyamiranye muri Libiya, yateye ubuzima bw’abasivili hejuru, mu murwa mukuru na hafi yawo.

Umuyobozi wungirije w’intumwa za ONU, Matthew Brook, ejo kuwa gatatu yavuze ko nta byago byugarije impunzi n’abimukira birenze ibiri ubu. Yavuze ko ari ngombwa ko impunzi ziri mu makuba zirekurwa zikajyanwa ahandi hari umutekano.

Ishami rya ONU ryita ku mpunzi HCR, yavuze ko icyemezo cyayo cyo gukura impunzi muri gereza y’i Qaser Ben Gasheer, I Tripoli ku buryo bwihuse, cyaturutse ku makuru yavugaga ko bamwe bakubiswe, bakangishijwe kuraswa, aho binubiye kubaho mu buryo bucucitse no kubura ibiribwa.

Cumi na babiri bajyanywe mu bitaro.

Abayobozi muri ONU, bavuga ko bafite impungenge nyinshi z’umutekano w’abimukira bagera ku 3,000 bafungiye mu bigo bitandukanye by’i Tripoli. Bavuga ko ubushyamirane butuma bitoroha kubagezaho ibyangombwa bakeneye, byo kurengera ubuzima bwabo. ONU ikavuga ko ari ngombwa ko abasivili bahungishwa, bakabona amahirwe yo kujya kure y’imirwano.

Abimukira ibihumbi n’ibihumbi bava muri Libiya n’ahandi, bagerageza gukora urugendo rutoroshywe rwerekeza mu Bulayi bambutse inyanja ya Mediterane ku nkombe za Libiya buri mwaka.

Facebook Forum

XS
SM
MD
LG