Uko wahagera

Abimuwe muri Nyarutarama Ntibarabona Ingurane Bishimiye


Inzu zigomba kwimurirwamo abatuye i Nyarutarama(Bannyahe)

Abatuye mu kagari ka Nyarutarama mu mujyi wa Kigali  bongeye kugirana ibiganiro na minisiteri y’ubutegetsi bw’igihugu biganisha ku kubimura mu bice ubutegetsi buvuga ko bishobora gushyira ubuzima bwabo mu kaga.

Gusa ibiganiro byabo ntacyo byagezeho kuko abaturage basanga hagombye kubahirizwa amategeko u Rwanda rugenderaho mu kubimura ku mpamvu z’ibikorwa by’inyungu rusange.

Umwe mu baturage batuye i Nyarutarama mu midugudu ya Kangondo na Kibiraro mu mujyi wa Kigali bagomba kwimurirwa mu Busanza arabwira abategetsi ko inzu bategekwa kwimurirwamo zitajyane n’ibyifuzo bya bamwe mu bagomba kwimurwa.

Ni mu biganiro byabahuje imbonankubone n’umujyi wa Kigali na minisiteri y’ubutegetsi bw’igihugu bareba icyakorwa. Ni umushinga umaze imyaka ine abaturage barabariwe imitungo yabo, ariko ubwumvikane bukomeza kubura ku bimurwa n’abimura.

Bwana Godeffrey Karamuzi uyobora umurenge wa Remera yabanje gutanga ishusho rusange y’aho abaturage bagomba kwimurwa kuko ngo hatajyanye n’igishushanyo mbonera cy’umujyi wa Kigali.

Ariko atararangiza ijambo abaturage batangiye kumuvuga mu majwi yo hasi batemeranya na we aho buri umwe yari yicaye. Prof Shyaka Anastase ministre w’ubutegetsi bw’igihugu mu ijambo yageje ku baturage bahagarariye abandi muri uyu mushinga yababwiye ko ikibazo cyo kwimura abaturage kitari umwihariko w’iyi midugudu ahubwo kiri mu guhugu hose .Asaba ko bafatanya mu kugishakira umuti urambye.

Ni ibiganiro byaranzwe no kungurana ibitekerezo ariko bitagize icyo bigeraho nko mu bindi bihe byatambutse. Abaturage basaba ko amategeko yo kubimura ku bikorwa by’inyungu rusange yakubahirizwa. Babimburiwe na Bwana Jean de Dieu Shikama.

Kubera igihe bamaze badafite uburenganzira ku mitungo yabo, hari abavuga ko babuze ayo bacira n’ayo bamira. Bakabwira abategetsi ko n’ubwo batora amategeko baza ku isonga mu kutayubahiriza.

Kuri iyi nshuro ubutegetsi bw’umujyi wa Kigali buvuga ko hari imiryango 48 yemeye kwimukira I Busanza mu mazu yabaye abonetse. Mu batanze ibitekerezo babiri gusa ni bo bashyigikiye iki gitekerezo cyo kwimurwa. Ariko bagenzi babo na bwo bahitaga bavuga ko nta mitungo bafite aho bagiye kwimurwa. Hari n’uwarahiye aratsemba amanitse ukuboko kw’ibumoso ko atazajya muri iyo nzu y’uruganiriro gusa bitewe n’umuryango we.

Bagasaba ko nibinaba ngombwa intumwa za rubanda zabashyiriraho amategeko aboneye abaturarwanda bose bagatura mu mudendezo.

Ariko hari bimwe mu bibazo byabazwaga na rubanda abategetsi bakitangira itama nk’ikimenyetso cy’uburemere bwabyo.

Ibiganiro byamaze hafi amasaha abarirwa muri atatu byarangiye nta cyemeranyijweho n’impande zombi. Minisitiri w’ubutegetsi bw’igihugu Shyaka yizeje ko ibi bibazo bizakemurwa mu rwego rw’ibiganiro bizakomeza.

Kimwe mu byo bamwe bibajijeho ni uburyo ubutegetsi budashaka gushikama ngo bwubahirize icyo amategeko ateganya mu mishinga yo kwimura abantu ku bikorwa by’inyungu rusange ahubwo bugashaka gutwarira abaturage bose mu kivunge buvuga ko bugiye gukurikiza amategeko hari ababihomberamo. Ntacyo bwakomoje ku bashaka ingurane y’amafaranga bakanakomeza gutsimbarara ko imitungo yabo ari ntavogerwa. Gusa bwumvikanye buvuga ko abafite imitungo yihenze u buzabegera bukabaganiriza ukwabo.

Abasesengurira ibintu hafi bagasanga hagati y’abaturage n’ubutegetsi hagombye kubamo abanyamategeko bahuza impande zombi. Ibi biganiro bibaye mu gihe mu mpera z’icyumweru gishize hari hongeye kuzamuka intugunda aho bamwe bafashwe bagafungwa bazira gusubira gushinga amahema mu matongo yabo.

Kugeza ubu umujyi wa Kigali urabarura abasaga 6000 bari batuye ibishanga barimo abagera kuri 250 ba Nyarutarama basenyewe. Ku cyumweru gitaha ni bwo imiryango 48 byemejwe ko izimukira mu Busanza muri Kicukiro. Iki kibazo gifata umuzi mu 2017 kirareba imiryango isaga 150 bose hamwe. Barakajwe bikomeye n’uko hari abatuye umudugudu wa Kibiraro ya I baturanye wo bishyuye amafaranga. Ubutegetsi bw’umujyi wa Kigali buvuga ko abahawe amafaranga byashingiye ku miterere y’igishushanyo mbonera cy’umujyi.

Facebook Forum

XS
SM
MD
LG