Uko wahagera

Johnson&Johnson Yoba Idashobora Gukingira Covid-19 Nshasha


Incanco zakozwe na Johnson&Johnson

Abashakashatsi mw’ishuri ry’ubuganga rya kaminuza ya New York, baravuga ko urukingo rwa Johnson & Johnson rukoreshwa gukingira Covid 19, rushobora kuba rudafite imbaraga zihagije zo gukumira ubwoko bushya bw'iyo ndwara.

Abahanga bageze kuri uwo mwanzuro nyuma yo gukora ubushakashastsi bwimbitse ku maraso ya bamwe mu bitanze ngo bakorerweho igeragezwa. Nathaniel Landau, kizigenza muri ubwo bushakashatsi yatangaje ko uru rukingo rudafite ingufu zo kurinda iyi ndwara ku rugero rumwe n'iza Pfizer na Moderna zakozwe mu buryo bunyuranye n'ubwurwo.

Ubu bushakashtsi bwashyizwe ku rubuga rwo kuri murandasi ku wa kabiri ntabwo ruravugwaho n'impande zose z'abashakashatsi kuri Covid 19 cyangwa ngo bwandikwe mu gitabo cyagenewe kwandikwamo ubushakashatsi bwemewe. Bityo ntibugaragaza ibyemewe ku rwego rw'isi birebana n'uru rukingo. Ariko burajya gusa n'ubwagaragaye ko n'izindi nkingo zitangwa inshuro imwe nka Johnson & Johnson na AstraZeneca zitabyara abasirikare bo mu mubiri bahagije kurwanya ubwoko bwa Covid 19 nka Delta na Lambda.

Ubwoko bwa Delta bwagaragaye bwambere mu Buhinde buvugwaho kuba bwandura vuba kurusha ubundi. Ikigo cya Leta zunze ubumwe z'Amerika gishinzwe gukumira indwara kivuga ko abagera kuri 83 ku ijana bandura muri iki gihe basanganwa Covid 19 yo mu bwoko bwa Delta.

Johnson & Johnson iherutse gusohora ubushakashatsi bugaragaza ko urwo rukingo rushobora gukumira ubwandu bwa Covid 19 yo mu bwoko bwa Delta mu gihe cy'amezi 8. Ariko ubu bushakashatsi bushya bwasohotse muri kaminuza ya New York buragaragaza ko Johnson & Johnson yari isanzwe itanga urukingo rumwe noneho ikeneye urwa kabiri

Facebook Forum

XS
SM
MD
LG