Uko wahagera

Isirayeli na Palestina Birigamba Intsinzi Nyuma y'Intambara y'Iminsi 11


Abanyepalistina bishimira agahenge nyuma y'iminsi 11 y'intambara mu ntara ya Gaza

Abantu babarirwa mu bihumbi biroshye mu mihanda yo mu ntara ya Gaza imirwano ikimara guhagarara. Insoresore z'Abanyepalistina zizamura amabendera ya Palestina na Hamas, abantu bagenda bavuza amahoni y'imodoka batanga za bombo ku bo bahuye mu mihanda.

Ibyinshimo nk'ibyo kandi byabereye kimwe no mu burasirazuba ba Yerusalemu no mu karere ka Cisjordaniya ahatuwe n'Abayahudi.

Ministri w'Intebe wa Isirayeli, Benjamin Netanyahu, yavugiye kuri televiziyo ejo ku wa gatanu ko igisirikare cya Isirayeli cyashegeshe imbaraga z'umutwe wa Hamas zo kurasa ibisasu bya misile kuri Isirayeli.

Yavuze ko Isirayeli yishe abarwanyi ba Hamas barenga kuri 200 ikanasenya imwe mu miyoboro ya Hamas inyura mu kuzimu.

Umutwe wa Hamas n'uwa Jihad bivuga ho byatakaje abarwani 20 gusa.

Netanyahu yavuze ko ubu Hamas itagishobora kwihisha yemeza ko iyi ari intambwe ikomeye kuri sirayeli. Gusa yongeyeho ko Hamas iramutse yongeye kugaba ibitero Isirayeli yayisubizanya ingufu zo ku rundi rwego.

Umutwe wa Hamas na wo wigambye intsinzi. Ismail Haniyeh uwuyoboye uvuga ko uwo mutwe washoboye kwihagararaho "imbere y'umwanzi ukomeye mu buryo bwa gisirikare no mu buryo bw'ubukungu". Yarahiye ko azasana ibyangiritse mu ntara ya Gaza.

Ishami ry'Umuryango w'Abibumbye ryita ku buzima (OMS) ryavuze ko amavuriro 30 yasenyutse mu karere ka Gaza. Margaret Harris uvugira OMS yavuze ko Abanyepalistina 243 baguye muri iyo ntambara abandi 8538 bagakomereka.

Umuryango w'Abibumbye (ONU) watanze amadolari y'Amerika miliyoni 18.6 yo kwifashisha mu kubona ibikenewe ku buryo bw'ingoboka muri Gaza. ONU iravuga ko Abanyepalistina bagera ku 72000 bakuwe mu byabo mu ntara ya Gaza.

Facebook Forum

XS
SM
MD
LG