Intumwa z'Amerika n'Ubushinwa Zateranye Amagambo Akarishye

Abayobozi ba dipolomasi ya Leta zunze ubumwe z'Amerika n'Ubushinwa bateranye amagambo akarishye mu nama yabo ya mbere y'ubutegetsi bwa Perezida Joe Biden.

Iyi nama yatangiye ejo kuwa kane i Anchorage, umujyi wa mbere munini wa leta y'Alaska, iri mu burengerazuba bw'amajyaruguru bwa Leta zunze ubumwe z'Amerika, ku nkengero z'inyanja ya Pasifika.

Intumwa z'Amerika ziyobowe na minisitiri w'ububanyi n'amahanga Antony Blinken n'umujyanama wa Perezida Biden mu by'umutekano, Jake Sullivan. Iz'Ubushinwa zikuriwe umuyobozi w'urwego rw'ububanyi n'amahanga rw'ishyaka rimwe rukumbi rya gikomunisiti ry'Ubushinwa, Yang Jiechi, na minisitiri w'ububanyi n'amahanga, Wang Yi.

Agifungura inama, minisitiri Blinken yahise atanga ishusho y'ibiganiro, ati: "Tuzavuga ku mpungenge zikomeye dufite ku bikorwa by'Ubushinwa ku baturage babwo b'Abayisilamu bo mu bwoko bwa Uighur, biganje mu ntara ya Xinjiang," iri mu majyaruguru y'uburengerazuba bw'Ubushinwa. Leta zunze ubumwe z'Amerika ivuga ko barimo bakorerwa jenoside.

Ibindi bibazo Blinken yavuze biri kuri gahunda birimo ibya "Hong Kong, Taiwan, n'ibitero by'ikoranabuhanga (cyberattaques mu Gifaransa) by'Ubushinwa kuri Leta zunze ubumwe z'Amerika."

Blinken yanzuye avuga ko ibi bikorwa byose by'Ubushinwa "bibangamiye amahame agenga umudendezo w'isi."

Mu gisubizo cye, umuyobozi w'urwego rw'ububanyi n'amahanga rw'ishyaka rya gikomunisiti ry'Ubushinwa, Yang Jiechi, yavuze ijambo ry'iminota 15 mu Gishinwa, Abanyamerika badasemurirwa. Yavuze ko "Ubushinwa budashaka na gato ko Leta zunze ubumwe z'Amerika yivanga mu bibazo byabwo bwite, kandi ko buzafata ibyemezo bikwiye byo kubyivuna."

Yanenze ibibazo demokarasi y'Amerika irimo muri ibi bihe, uburyo Leta zunze ubumwe z'Amerika ifata abaturage bayo ba nyamuke, n'imyitwarire yayo mu bucuruzi mpuzamahanga. Ati: "Amerika ikoresha ubuhangange yihariye mu bya gisilikali n'ubukungu kugirango ikandamize ibindi bihugu yishyiriraho amategeko ndengamipaka." Ati: "Ibyo birakabije."

Minisitiri w'ububanyi n'amahanga w'Ubushinwa, Wang Yi, nawe yamaganye ibihano Leta zunze ubumwe z'Amerika yafatiye abategetsi b'Ubushinwa 24 ejobundi kuwa gatatu, kubera ibibazo bya Hong Kong. Ati: "Si uko wakira abashyitsi."

Impande zombi zateranye amagambo, baregana ko barenze ku myitwarire n'ikinyabupfura bya dipolomasi. Inama yakomeje uyu munsi, ariko impande zombi zivuga ko nta gitangaza ziyitegerejemo.