Uko wahagera

Imirwano Hagati y'Aborozi n'Abahinzi muri Tchad Yahitanye 35


Muri Tchad, aborozi barwanye n'abahinzi hapfa abantu 35, mu majyepfo y'igihugu.

Iyi mirwano yabaye mu ntara ya Salamat. Umunyamabanga mukuru wayo, Mara Maad, uyu munsi yabwiye ikigo ntaramakuru AFP cyo mu Bufaransa ko yatangiye kuwa mbere. Ati: "Ubu noneho ntaho iyi mirwano ihuriye no gupfa ubwatsi, nk'uko bikunze kuba. Ahubwo abahinzi bagize gutya, bahura mu muhanda na bariyeri y'abantu twakwita abajura. Bishe umwe muri abo bahinzi, bakomeretsa abandi babili.

"Bukeye kuwa kabili, abahinzi bagabye igitero ku borozi, bavuga ko ari bo bari bateze iriya bariyeri mu muhanda. Leta, ibimenye, yohereje vuba vuba ingabo z'igihugu zo kubihosha. Ariko imirwano yarangiye ihitanye abantu 35, barimo n'umusilikali umwe."

Intambara nk'izi zibaho kenshi mu majyepfo ya Tchad, aho abaturage benshi batunze imbunda mu ngo zabo. Akenshi izi ntambara zishyamiranya Abirabura b'abahinzi bahatuye n'aborozi bo mu bwoko bw'Abarabu, bahora bagenda bashakisha ubwatsi bw'amatungo yabo.

Nko mu kwezi kwa 11 gushize, abantu 22 bishwe mu mirwano yabaye hagati y'abahinzi n'aborozi mu ntara ya Kabbia, naho mu majyepfo ya Tchad. Inka z'aborozi zari zononnye imilima y'abahinzi kubera kurisha ibihingwa byabo. Abandi bantu 50 baguye mu mirwano nk'iyo mu kwezi kwa 12 n'ukwa mbere gushize mu majyepfo ya Tchad.

Facebook Forum

XS
SM
MD
LG