Uko wahagera

Ingabo za Leta n’Inyeshyamba Muri Sudani y’Epfo Bagirizwa Ubwicanyi


David Shearer, intumwa idasanzwe y'umunyamabanga mukuru wa ONU

Muri Sudani y’Epfo, ingabo za leta n’inyeshyamba bishe abaturage barenga ijana mu ntambara yabo mu majyepfo y’igihugu hagati y’ukwezi kwa cyenda k’umwaka ushize n’ukwa kane k’uyu turimo. Usibye ubwicanyi, baregwa kandi no gufata abagore n’abakobwa ku ngufu byakoreshejwe nk’intwaro y’intambara ku buryo buteye ubwoba.

Ibi byose byatangajwe uyu munsi n’umutwe w’ingabo z’amahoro za ONU muri Sudani y’Epfo witwa UNMISS mu magambo ahinnye y’Icyongereza. UNMISS ikuriwe na David Shearer wo muri Nouvelle-Zelande, naho ishami rya gisilikali rikuriwe n’Umunyarwanda, Lieutenant General Frank Mushyo Kamanzi.

Leta ya Sudani y’Epfo yanze kugira icyo itangaza kuri iyi raporo ya ONU. Umuvugizi w’igisilikali cyayo, Lul Ruai Koang, yabwiye abanyamakuru ko ntacyo yavuga kubera ko atarayibona.

Leta ya Sudani y’Epfo n’inyeshyamba basinye amasezerano yo kurangiza intambara mu mwaka ushize mu kwezi kwa cyenda. Ariko bananiwe kuyashyira mu bikorwa. Intambara yatangiye muri Sudani y’Epfo mu 2013 hagati y’ingabo za leta n’iza Rieck Machar imaze guhitana abantu barenga ibihumbi 400.

Facebook Forum

XS
SM
MD
LG