Uko wahagera

Ingabo z'Amerika Zishe Umuyobozi w'Umutwe wa Leta ya Kisilamu muri Siriya


Perezida Joe Biden Atangaza urupfu rwa Abu Ibrahim al-Hashimi al-Qurayshi

Mu itangazo yashyize ahagaragara, perezida wa Leta zunze ubumwe z'Amerika, Joe Biden, aragira, ati: "Mu ijoro ryakeye, ku itegeko ryanjye, abasirikare b'Amerika batunganyije neza mu burengerazuba bw'amajyarugu ya Siriya igikorwa cyo kurwanya iterabwoba. Mu mirwano, twahitanye Abu Ibrahim al-Hashimi al-Qurayshi, umuyobozi wa ISIS. Abanyamerika bose batashye amahoro."

Nk'uko tubikesha ikigo ntaramakuru AP cyo muri Leta zunze ubumwe z'Amerika, imirwano yabereye mu ntara ya Idlib. Naho al-Qurayshi, wari uzwi no ku rindi zina rya Amir Muhammad Sa’id Abdal-Rahman al-Mawla, yabaye umuyobozi w'Umutwe wa Leta ya Kislamu mu kwezi kwa 10 mu 2019, nyuma gato y'iyicwa n'uwari uwukuriye Abu Bakr al-Baghdadi, nawe wahitanywe n'ingabo z'Amerika.

Al-Qurayshi yumvise Abasilikare b'Amerika bagiye kumugeraho, yituritsa n'igisasu, apfana n'abantu bo mu muryango we. Imirwano yamaze amasaha abiri n'abari barinze urugo rwe. Yarangiye iguyemo abantu 13, barimo abana batandatu n'abagore bane.

Naho ikigo ntaramakuru Reuters cyo mu Bwongereza kivuga ko igitero cyatangiye mu ma saa sita y'ijoro (ku isaha yo muri Siriya). Abasirikare b'Amerika babanje gukoresha indangururamajwi babwira abagore n'abana guhunga hakiri kare. (VOA/White House/AP/Reuters)

Facebook Forum

XS
SM
MD
LG