Uko wahagera

Imyigaragambyo yo Kweguza Perezida wa Sudani Irakomeje

update

Hanze y’icyicaro gikuru cy’ingabo za Sudani mu murwa mukuru Khartoum, kuri uyu wa kabiri humvikanye urusaku rw’amasasu. Hari ku munsi wa gatatu w’imyigaragambyo yikurikiranyije igamije kwirukana perezida Omar al-Bashir.

Abigaragambyaga benshi bateraniye hanze y’icyo kigo kuva kuwa gatandatu. Bashaka gusezerera ubuyobozi bw’igitugu bwa al-Bashir bumaze imyaka 30. Minisitiri w’ubutegetsi bw’igihugu, Bushara Juma, ejo kuwa mbere yavuze ko abigaragambyaga babarirwa mu bihumbi 10, bateraniye aho hanze y’icyo kigo cya gisilikare kuwa gatandatu. Ni imwe mu myigaragambyo yahuruje imbaga kuva yatangira mu mezi atatu ashize.

Abantu batandatu biciwe mu murwa mukuru Khartoum, ubwo ingabo zishinzwe umutekano zasesaga imyigaragambyo. Undi muntu umwe yaguye mu myigaragambyo nk’iyo muri leta ya Darfur, Juma yavuze.

Imyigaragambyo yatangiye kw’italiki ya 19 y’ukwezi kwa 12. Bamaganaga guverinema ya Bashir kuba yaracunze nabi umutungo bikaba byaratumye ibiciro by’ibiribwa bizamuka, hamwe n’ibya lisansi n’ifaranga ry’amahanga rikaba ryabaye ingume.

Bashir yashyizeho ibihe bikomeye mu gihugu hose kw’italiki ya 22 y’ukwezi kwa 2, agerageza guhagarika imyigaragambyo, nyuma y’uko guhiga abigaragambyaga ntacyo bitanze. Mu byumweru bishize guverinema yavuze ko abantu 31 baguye muri iyo myigaragambyo. Ariko itsinda ry’abaganga b’umuryango urengera uburenganzira bwa muntu, rigereranyije rivuga byibura 60.

Guverinema ya Sudani ikomeje gukaza ingamba zafashwe zavuyemo itabwa muri yombi ry’abigagarambya, abayobozi batavuga rumwe n’ubutegetsi hamwe n’abanyamakuru.

Facebook Forum

XS
SM
MD
LG