Igitero gikaze cyane cyo ku ikoranabuhanga kibasiye ibihugu 17 icyarimwe. Abagikoze bavuga ko bashaka amamiliyoni y'amadolari y'ingurane kugirango bafungura mudasobwa zabyo. Inzobere mu ikoranabuhanga bemeza ko iki gitero ari cya mbere gikomeye gikwirakwiye isi yose icyarimwe. Bavuga ko babaruye ibihugu byibura 17 byatewe, birimo Ubwongereza, Canada, Argentine, Mexique, Indonesia, Nouvelle-Zelande, Suwede, Ubudage, Afrika y'Epfo, Kenya na Leta zunze ubumwe z’Amerika. Igitero kibasiye ibigo bya za leta n'iby'ubucuruzi, birimo iby'imali.
Aba bahanga barega umutwe witwa REvil ko ari wo wagikoze. Kandi koko wasabye amadolari miliyoni 70 kugirango utange urufunguzo rwo gufungura mudasobwa zagagaye. Abahanga mu by'ikoranabuhanga kandi bemeza ko uyu mutwe ufite icyicaro mu Burusiya.
Ikigo cya Leta zunze ubumwe z'Amerika cy'ubugenzacyaha FBI cyatangaje ko cyafunguye anketi. Naho Maison Blanche, perezidanse ya Leta zunze ubumwe z'Amerika, yatangaje ko Perezida Joe Biden yatanze amategeko ko "guverinoma ye ikoresha uburyo n'ubushobozi byose ifite" muri izi anketi.
Nk'uko ikigo ntaramakuru AP kibyemeza, Perezida Biden yatangaje ko "guverinoma ye izivuna Uburusiya niramuka isanze buri inyuma y'iki gitero."
Facebook Forum