Abakuru b'ibihugu icyenda byo mu Bulayi bw'Uburasirazuba biri mu muryango wa OTAN barakora inama uyu munsi ku buhanga bwa videwo. Bayitumiyemo na Perezida Joe Biden. Iyi nama bise "Bucarest Nine" irayoborwa na Perezida Klaus Iohannis wa Rumaniya. Iramuhuza na bagenzi be ba Bulgariya, Estoniya, Hongriya, Letoniya, Lituwaniya, Polonye, Slovakiya na Repubulika y'Abacek.
Ibi bihugu byose ni byo mu karere ka OTAN, umuryango w'ubutabarane bwa gisilikali hagati y'ibihugu bituriye amajuaruguru y'inyanja y'Atlantika, kegereye Uburusiya. Abenshi mu bayobozi babyo bafite impungenge z'Uburusiya, cyane cyane nyuma yo kwigarura mu 2014 intara ya Crimeya ya Ukraine, nayo ituranye nabyo.
Mu itangazo yanyujije kuri Twitter, Perezida Iohannis yavuze ko "yishimiye kandi kuyakiramo n'umukuru wa Leta zunze ubumwe z'Amerika, Joe Biden, n'umunyamabanga mukuru wa OTAN, Jens Stoltenberg. Inama "Bucarest Nine" iriga ku kibazo cy'umutekano mu karere no muri Ukraine, n'ubwo Ukraine itari muri OTAN. Mu kwezi gushize, Perezida Joe Biden yamereye mugenzi we wa Ukraine, Volodimir Zelenski, ko
Leta zunze ubumwe z'Amerika izongerera inkunga Ukraine mu by'umutekano no kurengera igihugu. "Bucarest Nine" irategura inama rusange y'abakuru b'ibihugu bya OTAN ku italiki ya 14 y'ukwezi gutaha ku cyicari gikuru cy'umuryango i Buruseli mu Bubiligi. Yo izaba amaso ku yandi, bose uko ari 30 bahibereye. Bizaba bibaye ubwa mbere Perezida Joe Biden agendereye umugabane w'Ubulayi nk'umukuru w'igihugu. Inama yabo iziga ku bibazo by'Uburusiya n'Ubushinwa, itahuka ry'abasilikali mpuzamahanga muri Afghanistani, n'ejo hazaza ha OTAN.
Facebook Forum