Uko wahagera

Amajwi y'Amatora ya Perezida muri Nijeriya Arategerejwe


Umutegarugori urimo gutora mu gace ka Damilu Yola, muri Nijeriya taliki 23/2/2019

Amatora arakomeza mu duce tumwe na tumwe tw'igihugu

Muri Nijeriya ibarura ry’amajwi y’amatora y’Umukuru w’Igihugu ririmo riraba mu gihe amatora atararangira mu bice bimwe byo mu cyaro. Komisiyo Yigenga Ishinzwe Amatora muri Nijeriya (INEC) iravuga ko yongera kuyasubirishamo muri ibyo bice birimo Lagos, Rivers no mu ntara za Anambra aho yarogowe n’imvururu zabaye.

Umunyamakuru w’Ijwi ry’Amerika Peter Clottey uri Abuja aravuga ko Komisiyo Yigenga Ishinzwe Amatora iteganya gutangaza amajwi y’agateganyo kuri uyu wa mbere.

Yaba Perezida Muhammadu Buhari wari usanzwe ku butegetsi cyangwa Atiku Abubakar, umwe mu bakomeye bahatanira umwanya wa perezida, bombi baremeza ko bizeye instinzi.

Amatora yo muri Nijeriya yagombaga kuba taliki ya 16 z’ukwezi kwa kabiri ariko komisiyo ishinzwe amatora iyasubika igitaraganya hasigaye amasaha atanu gusa ngo ibiro by’itora hirya no hino mu gihugu bifungure.

Mu cyumweru gishize muri Nijeriya havutse ubushyamirane bushingiye kuri politike mu gihe cyo kwiyamamaza ishyaka riri ku butegetsi n’iritavuga rumwe na leta ashinjanya gushakisha uburyo bwo kuziba amatora.

Inzego z’umutekano ziravuga ko abantu 16 baguye mu mvururu zishingiye ku matora muri icyo gihugu.

Facebook Forum

XS
SM
MD
LG