Abaturage bishe umukozi wo mu buvuzi mu burasirazuba bwa Repuburika Iharanira demokarasi ya congo.
Uwo mukozi yari umwe mu bahanganye n’icyorezo cya Ebola. Abo baturage basahuye ikigo kivurirwamo iyo ndwara. Ibi biri muri raporo, ibiro ntaramakuru by’Abafaransa byabonye kuri uyu wa mbere.
Abatuye umudugudu wa Vusahiro mu karere k’ubuzima ka Mabalako mu ntara ya Kivu y’amajyaruguru barahagurutse kuwa gatandatu batera itsinda ry’abakozi barwanya Ebola. Ibyo byasohotse mu nyandiko yo ku cyumweru ya minisiteri y’ubuzima mu gihugu.
Ivuga ko umukozi mw’itsinda rishinzwe isuku mu rwego rwo kurwanya no guhagarika ubwandu bwa Ebola yapfuye arimo kujyanwa ku bitaro amaze gukomeretswa.
Ikigo cy’ubuzima cya Vusahiro cyarasahuwe gisigara kimeze nk’ahantu hajugunywa imyanda. Amazu atatu nayo mu mudugudu yarahiye arakongoka.
Mu kindi gitero, ikigo cya Valumba gisuzumirwamo indwara ya Ebola, mu ntara y’ubuzima ya Butembo cyarasahuwe ibintu biramenagurwa mw’ijoro ryo kuwa gatandatu rishyira ku cyumweru.
Icyorezo cya Ebola cyatangajwe mu burasirazuba bwa Congo mu kwezi kwa 8 kw’umwaka ushize. Cyahitanye abantu barenga 1,200 mu ntara ebyiri. Izo ni Ituri na Kivu y’amajyaruguru.
Mu byumweru bishize kandi abandi, abandi bantu baranduye.
Ibikorwa byo kurwanya icyo cyorezo, byatambamiwe n’ibitero by’abarwanyi ku bigo by’ubuvuzi, aho bamwe mu bakozi biciwe. Bishwe na bamwe mu baturage badashaka amatsinda ry’ubuvuzi. Kuva icyo gihe, ibitero byahitanye abantu bane. Abandi babarirwa muri mirongo barakomeretse, barimo n’abarwayi nk’uko minisiteri y’ubuzima yabitangaje kuwa gatanu.
Facebook Forum